Илена Тойгильдина Пошкырт кундемысе Благовещенск олаште шочын-кушкын. М.Акмулла лӱмеш Пошкырт кугыжаныш педуниверситетыште визымше курсышто тунемеш, руш йылме ден литературым туныктышо лияш ямдылалтеш.
– Лӱмет мом ончыкта манын, шукын йодыт. «Илышым илена» манын умылтарем. Тыгай лӱмым мыланем ачам-авам пуэныт.
Загсыш мийымеке, ачамлан тыгай лӱм уке маныныт, мутерымат ончыктеныт. Ачам книгада тоштемын манын, вес кечын Семён Новиковын «Марий лӱм-влак мутержым» намиен ончыктен.
Ачам-авам мыланем икмыняр лӱмым шонен ямдыленыт улмаш. Шочмекем, шӱй йырем кылымде кишке гай пӱтырналтын. Но мый таза йоча шочынам. Садлан вигак Илена лӱмым пуэныт. Кушмо семын лӱмемым эше чот суленам. Мый эре илышым йӧратыше, пеш чолга лийынам, – манеш ӱдыр.
И.Тойгильдина кызытат чулым, тӱрлӧ шанче конференцийым, студент-влаклан мероприятийым эртара, грантовый проект-влакым илышыш шыҥдараш полша. Тений «iВолга» молодёжный форумышто ик тренинг рӱдер дене пырля «Мастера воспитания» образовательный сменым эртарен. Ӱдыр спорт денат пеҥгыде кылым куча. Уфа олаште биатлон дене чемпионатлаште волонтёр да судья семынат полышкала. Тыгак путешествоватлаш йӧрата.
Илена кызыт марий йылмым сайынрак тунемаш пижын.
– Марла ойлымым чыла умылем, изиш кутыренат моштем. Ача-авамын Калтаса районысо шочмо Шоръялышкышт мийымеке, марла мутланаш тыршем. Тений июльышто Марий Элыште Марий йылме лагерьыште (Килемар районысо «Раздолье» каныме базыште) лийынам. Тушто пеш келшен, марий калыкын тӱвыраж нерген шуко пален налынам, – ойла ӱдыр.
И.Тойгильдинан альбомжо гыч налме фото.