Кеҥеж жап ялысе калыклан шуко пашам луктеш. Садлан паша деч нойышо калыкым мыняр-гынат куандарыман. Лач ты амал дене шукерте огыл ме, тӱвыра пӧртын пашаеҥже-влак, ял калык деке лекна. А ялыште мероприятийыш утларакше илалше еҥ-влак ушнат. Нунын кокла гыч южышт чылт шкетын илен толашат. Куаныштым нигӧлан каласаш, ойгыштымат нигӧ дене лош пайлаш. Тыге нине илалше еҥ-влакым куандараш шонен пыштышна. А вет ятырынже эше Кораксола тӱвыра пӧртна пеленысе «Муро кумыл» ансамбльыш коштыт.
Кораксола ял ден Шӱргыял коклаште пеш чапле вер уло. Тушто 1992 ий марте Шӱргыял школ лийын. Вара йоча-влак Кораксола ялыш кок пачашан у Шӱргыял школыш тунемаш кусненыт. Тачысе кечын тошто школна олмышто пушеҥге-влак кушкын шогалыныт. А самырык тукым тиде сӧрал вершӧрым садыгак арален да тӧрлен шога. Теве мемнан Кораксола ялын чолга эргыже Александр Пидаевым чын патриотлан шотлаш лиеш. Тудо кажне шошым я шкетын, я йолташыже-влак дене пырля тошто школын олмыжым яндарын эрыктен шында. Тений беседкым уэмденыт. Тиде сылне верыште пайрем-влак эртаралтыт. Меат илалше-влакым ты вереш чумырышна. Сылне пӱртӱс аланыште йоча пагытыштым шарналтышт, йӧратыме мурыштым йоҥгалтарышт. Кумылыштат тодылалтын, шинчавӱдыштат лектын.
Елена Григорьева, Кораксола тӱвыра пӧрт вуйлатыше.
Снимкыште: Шӱргыялын тошто школ олмышкыжо илалше-влак йоча жапыштым шарналтат.
