Илалше-влаклан вашлийме вер

Морко посёлкышто Кугурак тукымын вашмутланыме рӱдерже почылтын.

Мероприятийыште Морко район администрацийым вуйлатыше А.Голубков, Россий Социальный фондын Марий Элысе пӧлкажым вуйлатышын алмаштышыже А.Лачков, районысо ветеран организацийын еҥже-влак лийыныт. Уна-влак ончылно ветеран-влакын «Россияночка» верысе ансамбльышт, Моркысо йоча сымыктыш школын «Созвучие» ансамбльышт выступатленыт. Районысо кидмастар-влак выставкым чумыреныт.

Тиде кундемыштына шымше рӱдер. Тыште Морко районышто илыше илалше еҥ-влак чонлан келшыше занятийым муын кертыт. Рӱдерыште финанс грамотность шотышто урок, таза илыш-йӱла нерген лекций, спорт, интеллектуальный да моло занятий-влак эртаралташ тӱҥалыт. Тыште изирак книгагудо, интернетан компьютер, ӱстембал модыш дене модаш вер, каныме пӧлем улыт. Икымше «Встреча для души» мероприятий Илалше-влакын тӱнямбал кечыштлан пӧлеклалтеш.

Морко посёлкышто Кугурак тукымын вашмутланыме рӱдерже тыгай адрес дене верланен: Морко посёлко, Советский урем, 18. Рӱдер 8 гыч 17 шагат марте пашам ышта.