Морко посёлкын талантан эргыже, И.С.Палантай лӱмеш тӱвыра да сымыктыш колледжын выпускникше Николай Эбукаев Сыктывкар олаште Коми Республикысе мурышо да куштышо кугыжаныш ансамбльыште кумшо ий кушта.
– Коля, кузе Сыктывкарыш логалынат?
– Нылымше курсышто тунемме годым мый «Марий Эл» кугыжаныш мурышо да куштышо ансамбльын участникше лийынам. 2016 ийыште Коми Республик 95 ияш лӱмгечыжым пайремлен. Родо-тукым калыкым саламлаш меат ансамбль дене миенна. Нылымше курсым тунем пытарымылан Сыктывкар ола гыч пашам ышташ ӱжмаш толын. Тудо жапыште ансамбль участник-влакым поген, поснак рвезе-влак ситен огытыл. Сандене, шуко шоныде, пырля тунемме йолташем Станислав Апаев дене коктын тушко каенна.
– Кушташ изи годсек йӧратет?
– Морко посёлкысо кокымшо номеран школышто нылымше классыште тунеммем годым ачам-авам мыйым тысе художественный школыш хореографий направленийыш пуышт. Тушто вич ий тунемынам. 2013 ийыште, индеш классым тунем пытарымеке, шке кумылын Йошкар-Олашке Палантай лӱмеш тӱвыра да сымыктыш колледжыш тунемаш пуренам. Куштызо лиям манын, изинекак паленам.
– Тугеже куштымаш илышыштет тӱҥ верыште лийын?
– Куштымаш деч посна мый икмыняр жап ӱстембал теннис дене заниматленам. Туге гынат куштымаш эре икымше верыште лийын.
– Колледжыште тунемме жапыште могай ансамбльлаште куштенат?
– «Марий Эл» ансамбль деч посна колледж пеленысе «Вдохновение» ансамбльын участникше лийынам. Ме концертлаште чӱчкыдын выступатленна, гастроль дене тӱрлӧ вере коштынна.
– Могай куштымашым утларак йӧратет?
– Чыла тӱрлымат. Ансабльыштына ме утларакшым калык куштымаш-влакым шындена. Кызытсе эстрадный постановкат улыт. Коми куштымаш деч посна вес калык-влакынат куштымашыштым ончыктена. Шукерте огыл родо-тукым калык-влакын йӱлаштым ончыктышо программым ямдыленна. Тушко марийын, удмуртын, мордван мурышт да куштымашышт пуреныт.
– Ансамбль дене гастрольыш чӱчкыдын коштыда?
– Да. Элнан тӱрлӧ регионлаштыже лиедена. Германийыш ик гана миенна. Тиде гастроль ушеш кодын. Вес эл, вес ола. Вес тӱняш логалмыла чучын. Икымше гана йот элыште лийынам да сандене, очыни.
– Мӧҥгет чӱчкыдын коштат?
– Кеҥежым отпуск жапыште гына.
– Марий Элыш пӧртылаш шонымаш уло?
– Кызытеш уке. Сыктывкарыштак пашам ышташ шонем.