Пекиныште эртаралтше Олимпийский модмаште ечызе Наталья Непряева чемпион лӱмым сулен налын.
Кокымшо кечын 26 ияш Наталья Непряева 15 меҥгыш куржмаште (скиатлон) кокымшо верым налын. Тудо финишыш Норвегий гыч Тереза Йохауг деч 30,2 секундлан варашрак толын. Россий гыч Анастасия Рыгалина 8-ше верыште лийын, Татьяна Сорина – 11-ше, а Юлия Ступак – 24-ше.
Варажым Наталья Непряева эстафетыште Российын сборныйыштыжо шӧртньӧ медалян лие. Туддеч посна эстафетыште Юлия Ступак, Татьяна Сорина да Вероника Степанова таҥасеныт.
26 ияш Наталья Непряева Тверь олаште шочын-кушкын. Тудо ятыр кече ече дене куржталме «Тур де Ски» таҥасымаште (2021-2022) общий зачётышто Российысе спортсменке-влак коклаште сеҥыше радамыш икымше гана логалын. Роликан ече дене тӱнян кок гана чемпионкыжо лийын. 2018 ий годсек – Российын сулло мастерже. Наталья аваже Ирина Владимировна Непряеван да Александр Васильевич Смирновын вуйлатымышт почеш ече дене кошташ шым ияшак тӱҥалын. Тверь ден Моско область-влаклан, Моско областьысе Спортын олимпийский видше-влакын рӱдержылан таҥасен, а 2019 ий годсек – Архангельск областьлан. Кызыт Наталья – Национальный сборныйышто палыме тренер Юрий Бородавкон командыштыже.
2014 ий годсек Российын сборныйыштыжо. 2016 ийыште Тӱнямбал кубокын этапыштыжее 20-шо лийын. «Тур де Ски» таҥасымаште 2018 ийыште спринтыште нылымше верым налын, 2017-2017 ийласе иктешлымаш почеш спринтыште – 5-ше вер, общий зачётышто – 11-ше.
2018 ийыште Телымсе Олимпиадыште скиатлон дене икымше гана таҥасен да 8-ше верыш лектын. Тунамак 4х5 км эстафетыште Ю.Белорукова, А.Седова да А.Нечаевская дене пырля той медальым сулен.
Натальян 19 ияш Дарья шӱжарже кодшо ий декабрьыште юниор-влак кокласе тӱнямбал первенстыште шӧртньӧ медальым сеҥен.