Мурызо Геннадий Васильев Надежда пелашыжым икымше секунд гычак йӧратен шынден. Тидын нерген тудо тыгерак каласкалыш:
– Мый ончыкылык пелашем дене 1990 ий 2 августышто икымше гана вашлийынам. Тылеч вара чоныштем ойлен моштыдымо шижмаш озаланен. Тудын нерген кечыгут манме гаяк шоненам. Мотор чурийже, капкылже, шинчаончалтышыже шӱмышкем икымше секунд гычак шыҥеныт. Тусо вашлиймаш деч вара кок арня вашла ужын огынал. Ик кечын чӱчӱэм дене машина дене кудалмына годым тудым Кожласола остановко воктене ужынам. Тунам тудо акаж ден велосипед дене кудалыныт. Чӱчӱэмлан машинам шогалте, тиде мыйын ӱдырем кудалеш манын кычкыренам.
Тудын деч ончыч ятыр ӱдыр дене палыме лияш, тӱрлӧ нерген кутыркалаш логалын гынат, иктат тыге чонемым савырен огыл ыле. Кумшо кечылан ӱдырын тӱсшым але лӱмжымат монден кертынам.
Икымше секунд гычак чоныш пурышо ӱдыр Надежда – кызыт мыйын пелашем. Ме 1990 ий 30 августышто загсыш йодмашым пуэнна да 3 ноябрьыште сӱаным ыштенна. Вич шочшым ончен куштенна. Вашла умылен, пагален илена. Тидыжым ешыштына ик эн тӱҥлан шотлена. Вет тыгай шижмаш деч посна ешын негызше «лушкыдо», «шӧрын кайыше» лиеш.