Икымше проектше — Саранскыш наҥгаен

Морко районысо Кокласола лицейын чолга тунемшыже-влак: Аделя Герасимова, Анастасия Петрова, Валерия Саина, Эдуард Кузмин Российысе «Большая перемена» конкурсын полуфиналышкыже лектыныт. Кызыт нуно конкурсын финалыштыже Саранск олаште улыт. Лудшына-влакым Аделя Герасимова дене палымым ыштена.

Лицейыште тунемаш келша

Ӱдыр Морко районысо Изи Корамас ял гыч. Кокласола лицейысе 11-ше кадет классыш вончен. Лицейыште кумылын тунеммыж нерген палдарыш. Тушто тунемше-влаклан тӱрлӧ могырым шуаралташ сай йӧн уло, мане. Умбакыже шкеж нерген тыгерак каласкалыш:

Туныктышо, пырля тунемме йолташ-влак кеч-кунамат полшаш ямде улыт. Тунемме годым мый интернатыште илем. Тыге сайрак, молан манаш гын шым шагат эрденак школыш ошкылына. Урок деч вара обществознаний, руш йылме, историй, экономике, право, ОВС предметла дене факультативыш коштам, шинчымашем келгемдаш тыршем. Яра жапыште спортзалыште але тренажёр залыште шуаралтам. Тыгак автомат дене лӱйкалаш, тудым писын рончен погаш тунемаш коштам. Тидыжым утларакшым кудыт гыч кандаш шагат кас марте ыштем. Тылеч вара мӧҥгысӧ пашам ыштыман, шке сомылланат жапым ойырыман.

Интернатыште илыше тунемше-влак, очыни, чынже денак кечыгут тунеммаште шолыт. Тидлан моткоч шуко жапым ойырат. Тылеч посна чолга еҥ-влак тӱрлӧ конкурсышто, акцийыште, слётыште шкеныштым тергат. Аделя теве Кокласола лицейын волонтёр-юнармеецше семын «Пост №1» акцийыште лийын. Пырля тунемме йолташыж дене Курымашлык тул воктене караулышто шоген. Тений кеҥежым самырык-влаклан военно-патриотический воспитанийым пуышо «Авангард» рӱдерын эртарыме  «Младшие сыны Отечества» кадет-влак сменыште лийын. Тушто ӱдырын эн кугу шонымашыже шукталтын – парашют дене тӧрштен.

Мый «Морко шӱшпык» волонтёр отрядын еҥже улам. Тудым Валентина Николаевна Васильева вӱда. Тудлан кӧра ме тӱрлӧ акцийыш чӱчкыдын ушнена. Мутлан, «Дорога к обелиску», «Георгиевская ленточка», «Вам, любимые!» да молат…  Тений ты отрядын еҥже-влак ДНР ден ЛНР гыч толшо еҥ-влаклан гуманитарный полышым погенна. Икманаш, отряд дене ятыр поро пашам шуктена. Тидланже Валентина Николаевналан тауштыман. Тудо мыланна шке жапшым моткоч шуко ойыра, шинчымашнам келгемдаш полша, поро пашам шукташ туныкта, – каласкалыш А.Герасимова.

Проектын лектышыже

Ӱдырлан «Большая перемена» конкурсын полуфиналыш логалаш кок заочный йыжыҥым эрташ кӱлын. Икымшыште  шкем палдарыме сынан эссем возыман, видеовизиткым войзыман да тестым решатлыман ыле. Кокымшышто команде дене ӱчашымаш лийын. Тушто кейсым решатлаш, проектым возаш кӱлын. Аделя тидлан «Музейный десант» направленийым ойырен. Темыже «Музей Казакова + Мы = Сохранение истории Малой Родины» маналтын.

– Мыйын шонымаште, ойырен налме теме оҥай да кӱлешан. Молан манаш гын тоштерым шымлыме годым шкан да тоштерын историйжым келгемден колтымаште моткоч кугу пайдам ышташ лиеш. Тыге шочмо-кушмо вер нерген утларак пален налаш кумылаҥат. Конкурсын полуфиналышкыже логалаш манын, ситыше баллым погыман ыле. Мый логалынам, кызыт Саранск олаште улам. Тыште 14 август марте лиям. 

Саранскыш толмо деч ончыч моткоч тургыжланенам. Кызыт кумыл нӧлтшӧ. Тыште чолга, ушан самырык еҥ-влак погыненыт. Кажне кечын экскурсий, пайдале мутланымаш, вашлиймаш-влак эртаралтыт. Ятыр ӱдыр-рвезе дене палыме лийынам, умбакыжат кылым кучаш тӱҥалына манын ӱшанем.

Аделя Герасимован да кундемна гыч кайыше моло ӱдыр-рвезе-влакын пашаштым конкурсышто сайын аклат манын, моткоч ӱшанена. Нунылан сеҥымашым да волгыдо кумылым тыланена!