18 декабрьыште Москосо Самырык-влакын полатыштышт йоча да самырык-влак толкынын икымше съездше почылтын. Марий Эл гыч тушко 12 еҥ ушнен.
Чылаже тушко элнан 89 регионжо гыч участник-влак чумыргеныт. Мероприятий годым «Науко да технологий», «Волонтёрство ден добровольчестве паша» да моло тематике дене площадкылаште пайдале мутланымаш-влак лийыныт. Тылеч посна ты толкынлан лӱмым пуымылан, могай пашам виктараш тӱҥалмылан да тудын кӱлешлыкшылан кугу тӱткыш ойыралтын. Тыге йӱклымаш почеш РДШ (Российское движение школьников) движенийым ынде «Движение первых» манын, официально ойлаш тӱҥалыт.
Икымше тыгай кугу съезд самырык-влак коклаште патриотизм шӱлышым пеҥгыдемдаш, келшымашым, икте-весым аклаш да пагалаш, историйым шарнаш туныкта. Тудын кӱлешлыкшым тыште лийше ятыр кугыеҥат пеҥгыдемден. А участник-влакын кумылыштым эшеат кӱшкӧ Россий эстрадын шӱдыржӧ-влак П.Гагарина, В.Дмитриенко, Л.Агутин, SHAMAN нӧлтеныт. Тылеч посна К.Хабенскийын «Поколение Маугли» спектакльже гыч ужашым ончыктеныт да моло творческий номер-влакым ямдыленыт.
Интернет гыч налме фото.