Икымше марий савыктыш-влакын сӱретчыже

ХХ курымышто ыштыме автопортретше.

 

12 майыште художник, педагог Б.А.Яковлевын (1902-1984) шочмыжлан 120 ий темеш.

Борис Алексеевич Яковлев Царевококшайск олаште 1902 ийыште 29 апрельыште шочын. У стиль дене шотлымаште, тиде 12 майлан шотлан толеш.

1925 ийыште Кӱшыл художественно-технический мастерскойыш (ВХУТЕМАС) тунемаш пурен да тудым 1929 ийыште тунем лектын. «У вий» журналыште иллюстраций-влакым ыштен, Маркнигоиздатын икымше марий савыктышлаштыже сӱрет-шамычым келыштарен. Шочмо олажым пайремлан сӧрастараш полшен.

1943 ийыште фронтыш каен. Стрелковый дивизийын II степенян Суворов орденын 139-ше Краснознаменный стрелковый полкшын Йошкар знамя орденан 609-ше пулемётный батальоныштыжо служитлен. Спасск-Деменск ола воктене 50-ше армийын дивизийыштыже лийын.

Сар деч вара 1945 ийыште Йошкар-Олашке толын да Пионер-влак пӧртыштӧ изостудийыште, культпросветшколышто, тунемме верлаште сӱретлаш туныктен. Республикысе изосымыктыш тоштерыште тудын живописьше, графикше да моло жанрыште возымо пашаже аралалтыт.