13 да 14 мартыште Марий самырык театрын сценыштыже марий поэт Валентин Колумбын 90 ияш лӱмгечыжлан пӧлеклалтше «Валентин Колумб. Легенды милые, прощайте» руш йылме дене спектакль лиеш.
Таче шукынжо Колумб лудмашыш коштына, поэтын почеламутлажым лудына, тыгодым тудын илышыжым сайын огына пале. Лачак ты пьесыште автор Геннадий Гордеев поэт-новаторнан илышыжым утыр рашемдаш полша:
– У пашана дене Валентин Колумб нерген авторын, режиссёрын да Марий самырык театр труппын ужмашыштым ончыктена. Колумб нерген шуко возымым лудмо да серышлажым, шарнымашыже-влакым, поэзийжым, статья-шамычым шерын лекме деч вара тыгай пьесе шочо. Мыйын шонымаште, поэтын кӧргӧ чонжым, еш да мер илышыште кокытеланымашыжым, чон вургыжмыжым, илыш ончалтышыжым келгын ончыктымо. Ончаш толшо калыкат тидым ужшаш, шижшаш да шкаланже иктешлымашым ыштышаш: «Теве кузе поэт вургыжын илен улмаш». А ӱчашымаш лектеш гын, куанем гына – тугеже Колумб нерген моло-влакат шонкалат, вургыжыт, шарнат.
В.Колумбын рольжым модшо актёр Андрей Алексеев тыге ойлыш:
– Ты айдемын илыш корныжым, тӱрлӧ нелылыкым сеҥен лекмыжым, уста творческий пашажым калыклан почын пуаш – кугу куан. Но Валентин Колумбым лач тугайымак сценыште ончыктен огына керт, сандене ме почеламут гоч, илыш ситуаций гоч зрительым поэт-новатор дене сайынрак палымым ышташ тыршена. Спектакльыште ятыр авторын чылаже 15 почеламут йоҥгалтеш.
А 13 мартыште спектакль деч ончыч театрын фоештыже лӱмлӧ поэтлан пӧлеклалтше ШАРНЫМАШ КАС эртаралтеш. Тудо 17 шагатлан тӱҥалеш да книга выставке дене почылтеш. Театрын артистше да поэзийым йӧратыше моло йолташна-влак В.Колумбын почеламутшым лудыт, сӱретче Иван Ямбердов поэтлан пӧлеклалтше картиныж дене палдара, литератор-влак поэтын сылнымутшо нерген шарналтат, илыш йыжыҥже гыч оҥай историйым калкскалат.