8-14 апрельыште Йошкар-Олаште «Современный танец» номинацийыште балет артист ден хореограф-влакын Российысе конкурсышт лиеш.
Тудым Россий Тӱвыра министерствын да РФ Правительствын пунчалже дене «Росконцерт» тӱвыра тӧнеж эртара. Конкурсын художественный вуйлатышыже – Кугу театрын балетмейстерже, СССР-ын калык артистше Юрий Григорович.
Марий Элын рӱдолаштыже ты конкурс икымше гана эртаралтеш. Жюри член-влак элнан 22 олаж гыч 87 участникым дистанционно ойырен налыныт. Марий кундемын чапшым Роман Стариков, Валерия Волкова, Сергей Давыдов, Елизавета Кузнецова, Александр Чимаев, Софья Дмитриева аралат.
Жюри председатель – «Кремлёвский балет» театрын художественный вуйлатышыже, Российын калык артистше Андрей Петров. Аклыше-влак радамыште Российын сулло артистше-влак Константин Иванов (Марий Эл), Сергей Бобров (Красноярск), Ирина Афонина (Москва), Константин Уральский (Москва), Россий сымыктышын сулло пашаеҥже, Балет конкурс-влакын тӱнямбал федерацийыштын гендиректоржо Сергей Усанов, хореограф да артистке Софья Гайдукова (Москва) ден «Танцы на ТНТ» да моло телешоум вӱдышӧ, хореограф Александр Могилев, «Скрим» куштымаш театрын художественный вуйлатышыже Эльвира Первова (Самара) улыт.