20-21 апрельыште Санкт-Петербург олаште финн пӧртыштӧ «Живой язык» проект почеш мероприятий эртаралтын. Тушко финн-угор калык-влакын представительышт(коми, финн, удмурт, карел, марий) миеныт. Марий Эл гыч «Интеллектуал» тӱвыра рӱдер полшымо дене рӱдерын еҥже да МарГУ-што 4 курсышто тунемше Анастасия Галиева да мый миенна.
«Живой язык» – йылмым арален кодаш ыштыме социальный проект. Тудын ойыртемже – комикс. Тиде йӧн дене шочмо йылмым туныкташ шонат. Тыште мут шагал, но эн тӱҥжӧ умылаш лиймым возымо. Комиксым сӱретлен, изи йочат шочмо йылмым тунемын кертеш.
Командыште кум еҥ: Санна Хукканен (Финляндий), Анна Воронкова (Россий) да Катри Силвонен (Финляндий). Нуно, финн-угор калык-влакын илыме верышкышт миен, мастер-классым ончыктат. Тымарте Коми, Одо кундемлаште, Марий Элыште, Мордовийыште, Ханты-Манси автономный округышто лийыныт. Ты гана нуно нине калык-влакын представительыштым иквереш погеныт.
Икымше кечын «Финно-угорские проекты в области языка и культуры» семинар лийын. Тӱрлӧ кундемлаште шочмо йылмым аралаш манын, мом ыштыме, могай проект-влак улмо дене палдареныт. Мутлан, Карелийысе Ведлозеро селаште шочмо йылмылан туныктымо йочасадым почыныт. Тушто йоча-влак дене карел йылме дене гына мутланат. Але Ленингард областьысе Лужицы ялысе тоштерыште кеҥеж жапыште йылме квестым эртарат. Кажныже нине да моло проект-влак дене уна-влакым палдараш вашкен. Тылеч посна лӱмын ӱжмӧ уна – Арнау Бариос каталон йылме нерген каласкален.
Кокымшо кечын комикс дене пашам ыштенна. Ондак комиксын кӱлешлыкше, мом саемдаш, мом кораҥдаш кӱлмӧ нерген мутланенна. Вара, икмыняр тӱшкалан шелалтын, пырля комиксым сӱретленна. Жап шагаллан кӧра кажныже шке шонымашыжым шуктен кертын огыл, но эн кӱлешыжым тудо умылен, сандене шке шонымыжым мӧҥгӧ пӧртылмекыже шуктен кертеш, шонем.
Идей сай, семинар деч вара шуко оҥай шонымаш шочын. Эн тӱҥжӧ – фиин-угор калык-влакын представительышт дене вашлийынна, палыме лийынна. Тидыже эн кугу куан!