Иктыш ушышо
23-26 апрельыште Марий Элыште инвалид ден начар тазалыкан еҥ-влакын профессионал мастарлыкыштым тергыше «Абилимпикс» чемпионат эртаралтеш. Тушто тений 200 утла участник шке вийжым терга.
Пайремлын почмо
23 апрельыште Йошкар-Олаште Самырык-влаклан полатыште чемпионатым пайремлын почмо.
Тушко участник ден ӱжмӧ еҥ-влакым саламлаш Марий Эл Правительстве Председательын икымше алмаштышыже М.Васютин, Марий Элысе образований да науко министр Л.Ревуцкая, Марий Элысе паша да социальный аралтыш министрын пашажым жаплан шуктышо Г.Ярцева миеныт ыле. Нуно ты чемпионатын кӱлешлыкше нерген ойленыт да тышке толшо-влаклан сеҥымашым тыланеныт.
Уэмдыме полатын у сынан актовый залышкыже калык тич погынен ыле. Организатор-влакын ты мероприятийлан сайынак ямдылалтмыштат шижалте. 2023 ийыште лийше чемпионат нерген оҥай видеороликым ончышна. Сценыш лекше-влакын лӱмышт, кӧ улмышт фотосӱрет денат ончыкталте. Участник-шамычым Российысе «Абилимпикс» чемпионатыште сеҥыше Л.Новосёлова саламлыш. Р.Мухаметгалеев, И.Матвеев патриотизм шӱлышан муро-влакым шергылтарышт. А.Крылова ден М.Антипова мурызо Полина Гагаринан «Миллион голосов» мурыжым жест полшымо дене муреныт. Пайремле кумылым Российын, Марий Элын да «Абилимпиксын» гимнжат шыҥдараш полшеныт.
Э.Терентьеван да Марий политехнический техникумын фотошт.
