Марий Элысе Ий полатыште Правительстве Председатель пеленысе советын кундемыштына физкультурым да спортым вияҥдыме шотышто регионысо икымше заседанийже лийын.
Тушто таҥасымашлашке ямдылалтме да спортышто кугу кӱкшытыш шуаш лийме шотышто йодышлам каҥашеныт. Юрий Зайцевын палемдымыж почеш, кундемыштына 60 наре процент еҥ спорт дене пеҥгыде кылым куча, 2030 ий марте тудым 70 процентыш шуктышаш улыт.
Пытартыш вич ийыште Марий Элыште Российысе Спорт министерствын полшымыж дене 38 спорт объектым ыштыме. Ты пашам «Спорт – норма жизни», «Бизнес – спринт» федеральный проект-влак кӱшеш шуктымо. Тидлан 690 миллион теҥгем ойырымо. Кугу кӱкшытым ончыктышо спортсмен да тренер-шамычлан 2023-2025 ийлаште регионысо да федеральный бюджет гыч ик гана тӱлыман выплатым келыштарыме. Тудым 315 еҥ налын. 2026 ий гыч «Земский тренер» программе илышыш пурталтеш. Тудын дене келшышын, республикыштына 50 тӱжем еҥ марте илыман кундемыш тренерлан пашам ышташ каяш кумылан еҥлан 1 миллион теҥгем пуаш тӱҥалыт.
Марий Элыште чылаже 891 спорт да физкультур учреждений, 5 тунемме заведений уло. 2025 ийыште 633 тӱрлӧ спорт мероприятий эртаралтын, нунын коклаште – тӱнямбал да Всероссийский кӱкшытан таҥасымаш-влакат.
Марий Элым Вуйлатышын пресс-службыжын фотожо.