Россий мучко эртаралтше «Уло еш дене» проектыш Марий Турек посёлкышто илыше Шуталевмыт еш ушнен.
Александр Геннадьевич ден Светлана Александровна 2005 ий 5 августышто мужыраҥыныт, шым икшывышт уло. Александр Марий Турек район администрацийыште водительлан ышта, Светлана посёлкысо калыкым социально обслуживатлыме комплексный рӱдерыште пашам ышта, кызыт – йоча дене декрет отпускышто.
Ача-ава икшывыштым тӱрлӧ могырым шуарымылан кугу тӱткышым ойырат да шочшыштын сеҥымашышт дене кугешнат. Дмитрий эргышт англичан йылмым да машинам виктараш тунемеш. Константин эргышт да Дарина ден Мария ӱдырышт Марий Турек кыдалаш школышто тунемыт. Костя Йоча сымыктыш школышто хорышто мурымаш специальность дене шуаралтыт, фортепиано дене шоктен. Николай ден Игорь эргышт йочасадыш коштыт. Нуно сӱретлаш, мураш, кушташ да конструкторым погаш пеш мастар улыт, тыгак район конкурсышкат чӱчкыдын ушнат. Палемден кодыман, Константин, Дарина, Мария, Николай самбо дене заниматлат, куштат. Серафима ӱдырышт ик ийым веле эрталтен, тудат иза-акажым ончен шуаралт кушкеш.
Шуталевмыт моткоч чолга да уста улыт. Нуно тӱрлӧ форумышто, конкурсышто да акцийыште участвоватлат. 2022 ийыште Российысе «Ешын идалыкше» конкурсын региональный йыжыҥыште сеҥышыш лектыныт. 2023 ийыште Александр ден Светланалан «Родительская слава» орденын медальжым кучыктеныт.
– Ешым чумырымо годым тынар икшывына лиеш манын, шонен огынал, но кажне йоча шочмеке, утыр пиалан улмынам шижынна. Ме ваш пагален, полшен илена, коклаштына ӱшанымаш да тауштымаш озаланат.
«Уло еш дене» проект нерген уверым соцкылыште ужынам, чыланат участвоватлаш келшенна. Заданий-влак чонлан лишыл улыт. Икшыве-влакым гына ик верыште иканаште чумыраш нелырак лийын, молан манаш гын кугурак эргына Йошкар-Олаште ила, сандене южо заданийжым тудын деч посна шукташ логалын. Чыла сомыл кокла гыч мыланна Россий Президентым сайлымаш да поро пашам шуктымаш утларак келшеныт. Мыйын шонымаште, тиде эн кӱлешан событий-влак лийыныт, – ойла Светлана.
Шуталевмыт эре илыш дене тӧр каят. Тӱрлӧ таҥасымашке ушнымыштым, моло заданийым шуктымыштым эскераш оҥай.