Шукерте огыл Российысе «Уло еш дене» проектын 15-ше заданийжым увертареныт ыле. Кундемыштына ты проектыш ушнышо еш-влак тудым кумылын шуктеныт. Туштыжо поро пашам ыштымым ончыкташ кӱлын.
Кужэҥер посёлкышто илыше Леухин-Сабанцевмыт еш йоча-шамычышт дене пырля пырысым, чывым, кайыкым пукшеныт.
Вич эрган, кок ӱдыран
Елена ден Владимирын ешыштышт шым икшыве кушкеш. Шуко шочшан ача-ава икте-весе коклаште умылымаш, пагалымаш, йӧратымаш озаланышашым нигӧ деч сайын пала. Тидлан икшыве-шамычымат туныктат. Ты ешыште кажне йоча кушто-гынат шуаралтеш, могай-гынат сомылым шукта. Елена ешыж нерген тыгерак палдарыш:
– Вич эрган да кок ӱдыран пиалан ача-ава улына. Кугурак эргына, Максим, 25 ийым темен, а эн изижлан, Тимофейлан, шым ий. Максим ден Святослав (кокымшо эрге) пашам ыштат, кумшо ӱдырна, Алёна – студентке. Йошкар-Олаште Палантай лӱмеш Тӱвыра да сымыктыш колледжыште кумшо курсышто тунемеш. Молышт школышто шинчымашым погат. Андрей кандашымше, Ксения нылымше, Илья кокымшо, Тимофей икымше классыш коштыт.
Кок эргына вольный кредалмаш дене заниматла. Изирак эрге ден ӱдырна посёлкысо тӱвыра пӧрт пеленысе йоча ансамбльыште шуаралтыт. Мураш-кушташ кумылан улыт. Мый калыкым социально аралыме пӧлкан пашаеҥже улам. Начар тазалыкан еҥ-шамыч дене шинчем, нуным ончаш полшем. Пелашем ӧрдыж кундемыш пашам ышташ кудалыштеш.
Полшымаш шергакан
Аван палемдымыж почеш, лишыл еҥ-влак икте-весылан эҥертат, полыш кидым шуялтат, йӧратымыштым ончыктат гын, илашат куштылгырак. Садланак нуно икшыве-шамычлан тидымак шыҥдараш тыршат.
– Мемнан ешыштына тыгай закон уло: кӧ мо дене полшен кертеш, полшышаш. Тыгодым жап але вес амал чаракым ыштышаш огытыл. Мыйын шонымаште, йоча-шамычым изинекак тидлан туныктыман.
Пайремлан тӱрлӧ чесым ямдылен, ӱстел йыр чылан погынымымат икте-весе кокласе кылым пеҥгыдемдаш полшымаште сай йӧнлан шотлем. Тыгодым вашла пӧлекым кучыкташ, саламлаш лиеш. Тидыже чонышто куан тулым чӱкташ, шыргыжаш тарата. Ешна кугу гын, ме чӱчкыдын шочмо кече але вес пайремлан тыге чумыргена да шинчылтына. У ийлан уло еш дене пельменьым ыштена. Тидыже шкешотан еш йӱлаш савырнен, манаш лиеш.
Икымше кече гычак
«Уло еш дене» проектыш Леухин-Сабанцевмыт икымше кече гычак ушненыт. Проектын заданийже-влакым кумылын шуктат.
– Тушко ушнаш ӱдырнан кураторжо Надежда Дмитриевна темлен. Шуко шонен огынал, вигак кӧненна. Йоча-шамыч заданий-влакым куанен ыштат да весым вучат. Ты проектлан кӧра ача-ава да икшыве-шамыч жапым пырля шукырак эртарат. Тачысе кечылан проектын латвич заданийжым шуктенна да пырля лийме татын шергакан улмыжым шканна пеҥгыдемденна. Тӱрлӧ сомыл коклаште, южгунам, икте-весына нерген монденат кертына. А проектлан кӧра ме ешан, шочшан улмына нерген эреак шарнена. Заданий-влакым шуктымо годым кажнын кумылжо нӧлтеш. Тидыже чоныштына ӱмырешлан шарнымашеш кодеш. А ыштыме фотокартычке-влак нуным шарныкташ тӱҥалыт. Проектыш ушнымыланна моткоч йывыртенам. Ончыкыжымат еш-шамычым пеҥгыдемдаш, виянракым ышташ полшышо проект-влак лектыт гын, уло кумылын ушнена. Ме ты проектым шыҥдарыше-влаклан таум ойлена да чылалан порылыкым, йӧратымашым, пагалымашым тыланена!
Ешыште ача-ава да икшыве-влак коклаште кыл сай, пеҥгыде гын, нуно пиалан улыт. А тидыже, мутат уке, кугыеҥ-влак деч шога. Леухин-Сабанцевмыт мыланна тидын шотышто пример лийын кодыт.
Еш альбом гыч налме фото-влак.