Наташа ден Вера акак-шӱжарак улыт. Наташан вич ийым темымекыже, аваже кокымшо гана марлан лектын. Виктор пелашыже ты изи ӱдырым шке шочшыж гае ончаш тӱҥалын. Икмыняр жап гыч вате-марийын эше ик ӱдырышт шочын. Ты ошалге, канде шинчан азалан Вера лӱмым пуэныт. Наташа шӱжаран лие.
Суртоза ден озавате, икте-весым умылен, икойыш шуын иленыт гынат, кок ӱдырышт коклаште эре ваш умылыдымаш лектын. Наташа Верам йӧратен огыл, а Вера – Наташам. Нуно кӱлеш-оккӱлан ӱчашеныт, арверым таваленыт. Ака-шӱжар икте-весыштлан йӧршеш йот еҥ гай лийыныт. Кушмышт семын икте-весе деч эше утларак торленыт.
Тидлан амалжат лийын: Наташа аважын кокымшо гана марлан лекмыжлан сырен. Ӱдыр шке ачаж деке чот шӱман кушкын. Сандене вес пӧръеҥлан, туддеч шочшо шӱжаржылан тунемын кертын огыл. А Вера тидым умылен огыл, акаж ваштареш шоген.
Ача-ава шочшыштлан шкем шот дене кучаш, икте-весым пагалаш туныктеныт гынат, йоча-шамыч садак лӱшкеныт. Кушкын шумекышт, нунын койыш-шоктышышт вашталтеш манын ӱшанен. Но чыла арам. Икшыве-влак коктынат кӱшыл шинчымашым налыныт. Илыш-корнышко лекше ӱдыр-влак коклаште йоча годсо ваш ужмышудымаш садак аралатын кодын.
Ешыште лекше азап огыл гын, очыни, нуно тыгаяк йӱштӧ чонан кодыт ыле, очыни. Ик теле кечын авашт чот черланен: кынел кертдыме лийын. Тудым ончаш, пукшаш кӱлын. Тыге лишыл еҥышт воктене Наташа ден Вера черет дене шинченыт. Ава верч коктынат чот ойгыреныт. Чыла ты нелылык кок шочшым лишемден: вакшыште кийыше илалше черле ӱдырамашын мутшо чоныштым когартен. Шоҥго ава, кок ӱдыржын кидыштым кучен, ваш келшен илаш, кеч-могай нелылыкым пырля сеҥаш шинчавӱд йӧре сӧрвален. Мо оҥайже, ӱдыр-влак коклаште поро шӱлыш пурымеке, ава писын тӧрланен.
Ынде тидлан шуко жап эртен гынат, ӱдыр-влак тачат ваш келшат. Нуно икте-весе деке унала коштыт, шочмо суртышкышт пырля толын каят.
Иктым ойлынем: келшен илыман. Ончылно мо лийшашым палаш огеш лий. Таче сай, а эрла мо лиеш, ала?
Кристина.
Морко район.