Медведево посёлкышто илыше 48 ияш пӧръеҥ телефонжым йомдарен, икмыняр жап гыч тудын банкысе картыж гыч оксам кучылташ тӱҥалыныт. Эҥгек 60 тӱжем наре теҥгеш шуын, палдара Марий Элысе МВД.
Уголовный розыск пашаеҥ-влак осал пашам ыштен кертше еҥым, Медведево посёлкышто илыше да тылеч ончычат судитлыме 19 ияш рвезым, кученыт. Палдарымыж почеш, тудо ты телефоным муын да заводской настройко марте «эрыктен». Телефон ончычсо озажын банкысе картыж дене кылдалтше лийын. Тидын дене пайдаланен, рвезе ик маркетплейсыште шергакан телефоным да моло сатум налын. Сатум налме пунктыш толмекыже, тудым полиций-пашаеҥ-влак кученыт. Рвезе шолыштмо арверым пӧртылтен да титакшым умылен.