Параньга район Усола ялеш шочын-кушшо Сергей Миронович Сунгуров йоча жапше годсек физкультурлан мелын лийын, волейболла сайын модын. Самырык пӧръеҥын илышыштыже спорт тачат тӱҥ верым налеш. Кызыт тудо Медведево посёлкысо 3-шо №-ан исправительный колонийыште тырша, элгӧргӧ службын майоржо. Марий Элысе МВД-н «Динамо» волейбол командыштыже модеш да Медведево посёлкысо волейбол клубышто тренерлан пашам ышта.
Изиж годсек писе
Сергей изиж годсек спортын тӱрлӧ видыштыже шкенжым терген ончен да эре ончылно лийын. Писын куржталыштын, ече дене талын мунчалтен, дзюдо кучедалмашке ятыр ий коштын. А кугурак класслаште волейболла модаш кумылаҥын.
«4-ше гыч 9-ше классла марте шкенан йоча спорт школышто дзюдо кучедалмаш дене заниматленам. Тудым петырымеке, воллейболла модаш тӱҥалынам. Спортзалыште шкет кодам да тренироватлалтам ыле. Школысо турнирлаште чӱчкыдын модынам. Варажым мыйым волейболист-влакын районысо сборныйышкышт мыйым ӱжыч», – ойла Сергей Сунгуров.
Сборныйышто районысо тӱрлӧ школ гыч эн тале рвезе-влак погыненыт. Нуно районысо модмашке лектын коштыныт, тунемше-влак коклаште эртаралтше Марий Элысе чемпионатыште икмыняр гана таҥасеныт.
Туныктышо лиеш
Спортым йӧратыме кумыл рвезын ончыкылыкшым рашемден. Школ деч вара 2006 ийыште Н.Крупская лӱмеш Марпединститутышко физкультурым туныктышылан тунемаш пурен. Тушто опытан туныктышо, тренер-влак деч келге шинчымашым налаш, мастарлыкым нӧлташ шуко йӧн лийын.
«1-2-шо курслаште ме иймаш, куштылго атлетике, биатлон дене заниматленна. 4-ше курсышто тунемме годым у тренер Андрей Викторович Яковенко толын. Тудо мыйым волейболлан утыр шӱмаҥден. Институтышто волейбол командыште кок ий модынам. Ты жапыште тӱрлӧ вере таҥасенна. Йошкар-Оласе турнирлаште, республикысе кугу таҥасымашлаште модынна. Тыгак Угарман кундемышке, Чуваший Республикышке лектын коштынна», – ойла Сергей Миронович.
Армийыште – инструктор
Дипломым налмеке, самырык специалист армийышке служитлаш каен. Кӱшыл шинчымашан улмыжлан кӧра тудым физподготовко шотышто инструкторлан шогалтеныт. Срочник-влаклан тӱрлӧ спорт мероприятийым эртарен. Службышто тудо моло деч эре ойыртемалтын, тыштат волейболла модын. Шанхайский вашкыл тӱнямбал организацийын (ШОС) эртарыме ученийышкыже, Таджикистаныш волейбол дене таҥасымашке команде дене миен коштын.
«Динамо» волейбол командыште
2012 ий годсек Медведево посёлкысо колонийыште воспитатлыме паша шотышто отряд вуйлатышылан тырша. Чон йодмо пашажым огеш мондо. 2014 ийыште Марий Элысе МВД-н «Динамо» командыштыже кумылын модаш тӱҥалын.
«Тренировко Йошкар-Оласе «Динамо» спортзалыште эрта. Тушко паша деч вара кастене арнялан кок гана миен толам. Команде дене ме Марий Эл Республикыште веле огыл модынна, тыгак Озаҥ олаште силовой структур-влак коклаште эртыше Российысе чемпионатыште икмыняр гана шкеннам тергенна. Архангельск, Камчатка кундемла гыч толшо команде-влак дене модынна. Тыге ме опытым налына, шкем ончыктена», – ойла тудо.
Йоча-влакым туныкта
Кодшо ийын август тӱҥалтыште С.М.Сунгуровын полшымыж дене Медведево посёлкышто волейбол клубым чумырымо. Тренер тушто йоча-влакым волейболла модаш туныкта.
«Ты клубым ик футболист палымем дене почынна. Тудо кок ий ончыч футбол клубым чумырен. Тыге йоча-влак коклаште волейболым вияҥден колташ манын, мыланем ты пашам темлыш. Тренировко-влак Медведево посёлкысо школласе спортзалыште, «Витязь» ФОК-ышто, Йошкар-Оласе «Динамо» спортзалыште лийыт. Медведево посёлко, тыгак Йошкар-Ола гыч тӱрлӧ ийготан 150 наре икшыве коштеш. Ме вич тренер пашам ыштена. Мый ныл группо дене заниматлем.
Клубышто таҥасымашлам чӱчкыдын эртарена, йолташла (товарищеский) модмашке лектына. Мыйын ӱдыр-рвезем-влак вес ийын шошым тунемше-влак коклаште Марий Эл Республикысе чемпионатыште модаш тӱҥалыт», – мане С.Сунгуров.
Тренер лияш оҥай, но ответственность кугу. Тидын шотышто Сергей Миронович тыгерак каласыш:
– Йоча-влак тӱрлӧ улыт. Нунын дене пашам ышташ садак неле, кажныж деке посна корным муаш кӱлеш. Иктым мокталтет, весым изиш вурсет. Икте виян, пеҥгыде толеш, весе – начаррак. Кӧ дене умбакыже пашам ышташ куштылго лийшашым икымше тренировко гыч умылаш лиеш».
С.Сунгуров УФСИН-ын эртарыме «Профессиональный мастарлык» конкурсышто эре ойыртемалтын. 2016 ийыште республикыште икымше верышке лекмеке, тудо Озаҥыште таҥасен. Тудо 81 участник кокла гыч 7-ше верышке лектын. 2019 ийыште Марий Элын чапшым Санкт-Петербургышто арален. Тушто физический подготовко шотышо таҥасымаште 2-шо вер дене палемдалтын, пӧлек шотеш кидысе шагатым кучыктеныт.
Сергей ешыж дене Йошкар-Олаште ила. Надя пелашыже – медпашаеҥ. Павел эргышт 3-шо классыште тунемеш, Илья – 1-ше классыште.
Сергей Сунгуров шке опытшым, мастарлыкшым йоча-влаклан пуа, ончыкылыклан виян волейболист-влакым кушта. Тудлан сай лектышым, кугу сеҥымашым тыланыме шуэш.
