Медведево район Цибикнур кундемысе «Рвезе кумыл» фольклор ансамбльым телевидений гоч шукын шарнен кодыныт, очыни. Кызыт ансамбль шаланен, нунын выступленийыштым лач «Шӱмсем пӧлек» але Интернетысе Ютуб каналыште гына ужаш лиеш. Тушто тӱмыр дене перкален шогышо изи рвезе – кызытсе геройна Владимир Антонов. Усталык шӱлышан улмыжлан кӧра вич ияшак ансамбльыште выступатлен.
Изи годсек тӱмырым перкален
«Мый ныл шочшан ешыште шочын-кушкынам. Усталык шӱлышем, очыни, авам Евгения Викторовна деч куснен. Тудо Морко район Вончӱмбал ялын ӱдыржӧ. Мураш чот тале ыле. А ачам Вячеслав Прокопьевич техниклан шӱман лийын, колхозышто трактористлан пашам ыштен. Чаманаш логалеш, ачам ден авам ош тӱня дене чеверласеныт.
Школышко тунемаш кайымеке, кугу коллективын ешышкыже пӱтынек пуренам. Ончыч тӱмыр дене перкаленам, варажым мураш да кушташ тӱҥалынам. Армийышке кайымешке, коллективыште выступатленам. Шкетын мурен-куштен, икмыняр гана лауреат лӱмым сулен налынам.
Тӱрлӧ семӱзгар дене шоктен моштем. Шӱвыр шотышто гына изиш нелырак. Такшым гармонь, баян, гитар, пианино дене шоктен кертам. Кызыт усталыклан жапым шагал ойыро. Мыйын корнем Александра ӱдырем ден Никита эргым шуят», – ойла суртоза.
Владимир Вячеславович самырыкше годым верысе «Шойбулак» колхозышто столяр-плотниклан пашам ыштен. Варажым тудо илыш корныжым военный профессий дене кылдаш шонен. Армий деч вара кум ий контракт почеш служитлен. Но пӱрымаш шочмо кундемышке уэш пӧртылтен.
Елена пелашыжым, Козьмодемьянск олаште шочын-кушшо руш ӱдырым, Йошкар-Оласе Сеҥымаш паркыште ошкыл эртымыж годым вашлийын. Ӱдыр МарГУ-со биолого-химический факультетыште тунемын, тудо жапыште Йошкар-Олаште пашам ыштен. Тыге кок самырык еҥ икте-весым ваш йӧратен шынден.
Вате-марий 2010 ийыште ушненыт да Оршанке район Кугунур ялыште пӧртым налыныт. Вич йочам ончен куштат.
Вич шочшыжо куаным конда
Икшыве-влакым ончен кушташ, йол ӱмбак шогалташ шагал огыл тыршыман. Кугу оксан лияш манын, суртоза ик жап Озаҥ, Моско олалашке чоҥымо пашашке кудалыштын. Пытартыш ныл ийыште Йошкар-Олаште таксист сомылым шукта. Елена пелашыже Интернет аланыште оксам ышта.
Вате-марийын шочшышт тӱрлӧ шӧрын гыч мастарлыкыштым нӧлтен толыт. Визытынат школышко тунемаш коштыт. Эн кугурак икшывышт – 15 ияш Максим – 9-ше классыште тунемеш. Изиж годсек спортлан шӱман улмыжлан кӧра военный училищышке тунемаш пураш шона. Такшым рвезе рукопашный бой дене заниматла. 13 ияш Лилия 7-ше классыште тунемеш. Тудат изаж семынак спортлан шӱман, кучедалмашке коштеш. Тыгак йот йылмым тунемаш йӧрата. Ачажын мутшо почеш, ӱдыр япон йылмым тунемаш ямдылалтеш. Александра ачаж гае мураш кумылан. Йошкар-Олаште марий мурызо Марина Садован студийышкыже ик ий вокал дене заниматлаш кудалыштеш. Кугунур школысо «Шонанпыл» йоча ансамбльыште выступатла. Полина ӱдырышт 2-шо классыште шинчымашым налеш, сӱретлаш кумылан. Никита эргышт 1-ше классышке коштеш, кушташ тале. Кажне сем почеш тарваныл мошта, лывырге йолжо дене тавалтен колта.
«Пелашем да шочшем-влак мыланем нимо деч шерге улыт, нунылан кӧра илышлан куанем. Икшывына-влак верч кугу ответственностьым шижына, пашам ыштена. Пелашем дене ик ойыш шуын илена. Южгунам шыдешкена гынат, вашке сӧрасена. Елена – пашаче ӱдырамаш, сай озавате. Тамле кочкыш дене мемнам сийла, тидлан йоча-влакымат туныкта. Пашамат пырля кутырен ыштена, пӱртӱсышкӧ канаш лекташ жапым муына. Колым кучена, поҥгым, емыж-саскам погена», – ойла Владимир Вячеславович.
Антоновмыт вате-марий ава ден узо сӧснам ашнат. Тӱж сӧсна кажне ийын шуко игым ышта. Икмыняржым шканышт кодат, молыжым ужалат. Илаш толмекышт, ончыч казам кученыт. Кугу тӱкан шолдыра вольыкым роскотлан кӧра огыт ашне.
Антоновмыт еш родо-тукым, лишыл еҥ-влак дене пырля кугу пайремым, шочмо кечым пайремлат. Тунам суртыштышт шуко уна лиеш. Вет Владимир Вячеславовичын Эдгард изаж ден Вероника шӱжаржат шуко шочшан улыт. А У ий пайремым шке еш дене гына вашлийыт. Тунам ача-ава кажне икшывыжлан пӧлекым кучыкта.
