Закон почеш 23 шагат гыч 5 шагат эр марте 18 ийым темыдыме йоча-влак ача-ава деч посна общественный верыште коштшаш огытыл. Уке гын ача-ава-влак штрафым тӱлат. Штрафын кугытшо – 100- 500 теҥге.
Тидым Марий Эл Республикыште 2011 ий 10 майыште 18-З номер дене лукмо «О регулировании отдельных отношений в области защиты прав и законных интересов детей» закон почеш эскерат.
Йоча-влак йӱдым уремлаште, парклаште, скверлаште, стадионлаште, тӱшкан пайдаланыме транспортышто, интернет клублаште, ужалыме объектлаште, кочмо верлаште, каныме верлаште перныл коштшаш огытыл. Тиде жапыште полиций пашаеҥ-влак йочам законный представитель деч посна кучат гын, тудым полиций пӧлкашке наҥгаят. Тушто икшывын кушто илымыжым, ача-аважым кычалаш тӱҥалыт. Пален налмеке, ача-авалан каласат да нунылан гына йочам пӧртылтат. Ача-аван але йочам ончышын кушто илымыже пале огыл гын, икшывым специализироватлыме учрежденийышке колтат.