29 февральыште Марий Эл Кугыжаныш Погынын 42-шо сессийже эртаралте.
Ты гана депутат-влак 20 йодышым ончен лектыч. Килемар районысо ял шотан илем-влакым иктыш ушен, Килемар ола округым ышташ, Марий Эл ден Чувашийын чекыштым ойпидыш дене пеҥгыдемдаш, Кужэҥер районышто Кульшит ден Ананур яллам ушаш пунчальыч. Тыгак Шернур районышто Ахматэҥер ден Лапчын огыт лий, нуно пошкудо ялла дене ушалтыт. У Торъял район Тошто Торъял ял шотан илемыште ныл изирак ялым кугырак деке ушаш пунчалме. Советский районышто Зеленая Роща посёлко административно-территориальный вер манме гыч лукталтеш.
Республикыштына тӱвыра, бюджетысе права дене кылдалтше да Кугыжаныш Погыныш депутат-влакым сайлыме шотышто правил-влакым федеральный закон дене келшышын шуктымо шотышто пунчалым лукташ йӱклышт.
Сессийыште Кугыжаныш Погынын, Кугыжаныш счётный палатын, республикысе элгӧргӧ паша орган-влакын 2023 ийысе пашашт нерген докладым да отчётым колыштмо. Кугыжаныш Погынын «О состоянии законодательства Республики Марий Эл в 2023 году» докладшым пеҥгыдемдыме.
Тылеч посна кок судебный участкыште мировой судья-влакым палемдышт. Марий Элысе Судья-влакын квалификационный коллегийыштын ик еҥжын полномочийжым ончылгоч чарыме шотышто пунчал дене келшышт.