Шукерте огыл Владивостокышто «Движение Первых» толкынын федеральный Советшын III очный заседанийже эртаралтын. Российын тӱрлӧ регионжо гыч самырык еҥ-влак, пырля погынен, толкынын самоуправленийжым вияҥдыме шотышто проект-влакым ямдыленыт. Марий Эл гыч тушко МарГУ-н студенткыже Анастасия Соловьёва миен коштын.
Школ гычак
Ӱдыр – Советский посёлко гыч. Тусо 3-шо №-ан школышто тунемын. Тудо районыштыжо эртаралтше ятыр мероприятийыш кумылын ушнен. Визымше классыште «Радуга Добра» поро пашам ончыктышо ушемын еҥже, вара Российысе школьник-влакын движенийыштын чолга еҥже лийын. Движение Первых толкын ышталтмеке, тушто тыршаш тӱҥалын.
– Йоча да самырык-влакым пырля чумырышо «Движение Первых» толкын самырык-влакын чыла мер организацийыштым иктеш уша, манаш лиеш. Ты толкынлан кӧра мый шке гаяк чулым ятыр ӱдыр-рвезе дене палыме лийынам. Ме, вийнам иктыш чумырен, калыклан да элналан пайдам пуэн кертына. А ты толкынын Советше самырык еҥлан социально кӱлешан проектым ямдылаш да тудым илышыш пурташ, шке нерген палдараш, улан тунемаш йӧным ышта, – манеш А.Соловьёва.
Кажне регион гыч – ик еҥ
Федеральный Советыш еҥ-влакым ик ийлан ойырат, тушко 89 еҥ пура (кажне регион гыч – ик еҥ дене). Иквере погынен, ӱдыр-рвезе-влак Советын системыжым вияҥдымаште тыршат. Советын еҥже лияш манын, Анастасия куд ий жапыште шке районыштыжо чолгалыкшым ончыктен: тӱрлӧ акцийым да моло кӱлешан мероприятийым ямдылен, эртарен. Шке районысо тыгай Советым вуйлатен.
– Федеральный Советыш логалаш манын, икмыняр этапым вончаш кӱлын: ончыч шке тунемме тӧнежыште, вара районышто да регионышто сайлымашым эртыман. А ӱмаште декабрьыште «Движение Первых» толкынын Марий Элысе конференцийыштыже мыйым II Съездшын (толкынын кӱшыл органжын) еҥже семын ойыреныт. Тушко пӱтынь Россий гыч делегат-влак погынат. Тунамак мыйым Марий Эл деч федеральный Советыш колташ палемденыт.
Идалык мучко ме шуко пашам ыштенна. Икымше очный заседаний Москошто, кокымшо Санкт-Петербургышто лийыныт. А кумшыш Владивостокышто погыненна. «Океан» йоча рӱдерыш чумырген, шке пашанам иктешленна. Кажне тыгай погынымашын кӱлешлыкшым палемден кодынем. Лач тушто ме шуко пӱсӧ йодышым рашемдена да, шке шочмо кундемыш пӧртылын, палемдыме план почеш тыршена, – манеш Анастасия.
Туныктышо лийнеже
Школым тений шӧртньӧ медаль дене тунем пытарен, А.Соловьёва МарГУ-ш тунемаш пурен. «Педагогическое образование в области иностранных языков: английский и французский» специальностьым ойырен налын. Студент илышын тамжым ӱдыр але пален налеш гына, но, каласкалымыж почеш, тудлан келша. Преподаватель-влак умылен моштышо, полшаш кумылан улыт, пырля тунемше-шамыч денат кылым ыштен шуктен. Адакшым студентке университетыште эртаралтше тӱрлӧ мероприятийышкат ушнаш шона.
Анастасия – ответственный ӱдыр, тудын чылажат жапыштыже да шот дене ыштыме лийшаш. Мом шонен пыштен, нимом ончыде шукта. Критикылан ок сыре. Шуктымо пашаже шотышто анализым да иктешлымашым эреак ышта. Тыгодым ситыдымаш-влакым эре шотыш налман, нуно мыланна кушкаш полшат, манеш. Ончыкыжым ӱдыр шке тунемшыже-шамычлан сай педагог веле огыл, тыгак йолташ да наставник лияш шона.
А.Соловьёван альбомжо гыч налме фото.