Йӧратымашым муаш неле огыл, тудым арален кодаш нелырак. Йӧратыше-влак коклаште чоншижмаш, ваш умылымаш ынышт йом манын, шуко вий да чытымаш кӱлыт.
Ик шонымаш укелан кӧра мужыр-влак ваш умылымашым чӱчкыдын огыт му. Санденак шукын ойырлат. Йочам ышташ але бизнесым почаш, я кугу ола гыч ялыш илаш каяш шонеда гын, тӱҥжӧ: когыньданат тидым ышташ кумылда лийже.
Ешыштыда умылыдымаш лектын гын, эн ончычак шоналтыза: тиде айдеме дене ӱмыр мучко пырля кид кучен, ваш-ваш полшен, эҥертен илаш да тудлан шкем муаш изиш эрыкым пуаш келшеда мо? Келшеда гын, эн ондак лыпланыза, чылажымат вашкыде, сайын шонен-вискален ыштыза.
Илышыште ойырлышо да уэш ушнышо вате-марий чӱчкыдын вашлиялтыт. Тугеже нуно ик шонымаш денак илат.
Вашла эре шымлыза
Йӧратыме еҥдан тӱняужмашыжым, илыш деч мом вучымыжым палаш тыршыза. Поснак ӱдырамаш-влак тӱрлым шонен луктын моштымыштлан кӧра ӱмырышт мучко мотор йомакым вучат, тыгодым чыным палаш да ужаш ямде огытыл.
Икте-весыдам пагалыза
Пелашдам колыштын моштыза, тудлан ӱшаныза. Кок икгай айдеме лийын огеш керт. Кажныжын – шке койыш-шоктышыжо, шке шонымашыже. Еш коклаште шагалын еҥ чын мутланен мошта. Йоҥылышым проститлаш тунемза, шкежат проститлаш йодаш ида лӱд. Илышын тӱрлӧ шӧрынжым ужын да приниматлен моштышо айдеме гына пагалымашым сула.
Кӱлеш-оккӱлан ида ӧпкелалт
Мо шонымыдам ӧпкелалтын, чояланен, кычкырен налын тунемында гын, тиде сайыш ок кондо. Тыгай койышлан кӧра пелашда тендан деч йӱкшаш тӱҥалеш.
Вате-марийла чӱчкыдынрак малыза
Пелашланда мотор почеламутым лудаш, пырля «каваште чоҥештылаш» лиеш, но тиде пырля возын малымым алмаштен огеш керт. Вакшышыште вашла мо кӱлешым налын огыда керт гын, коктынат пиалдыме лийыда.Тыгодым ны йоча, ны окса кылдам пеҥгыдемден огыт керт.