Тений Российысе дизайнер-влакын «Исток-2024» конкурс-ончерышт Йошкар-Олаште эртаралтын.
Тудо Креативный индустрий арнян, 8 декабрьыште, пайремлын почылтын. Ты ончерым кажне кумылан еҥ Республикысе изосымыктыш тоштерыште 26 январь марте ончен кертеш. Экспозиций-влакым калык усталыкым да тӱвырам ончыктышо артефактла дене сӧрастарыме.
Конкурс
Конкурс
Тыште Российысе 24 кундем гыч 376 йодмаш пурен. Тӱрлӧ вершӧр гыч толшо пашалаште посна авторын, тунемме верын, дизайнын направленийжын, прикладной сымыктышын техникыжын моткоч шуко сынан да сӧрал улмыштым пеҥгыдемдыме. Тыгак конкурс самырык тукым коклаште у талант-влак дене палдараш полша.
Конкурсыш Марий Эл гыч 14 еҥ (профессионал ден студент-влак) ушнен. Сеҥышыш ик сӱретче-дизайнер лектын. «Декоративно-прикладной сымыктыш» номинацийыште Йошкар-Ола гыч Полина Метелькован «Край родной» манын лӱмдымӧ пашажым – керамике гыч ыштыме сӱретан талиҥгаже-влакым – жюри 3-шо степенян диплом дене палемден.
А Марий кундемыште тиде ончерым почмаш моткоч моторын ончалтын. Тушто Озаҥысе дизайнер-влак шке вургем коллекцийыштым ончыктеныт. Йошкар-Ола гыч Надежда Соловьеван «Идея» модо театрже тӱрлӧ тӱс дене волгалтше городецкий манме росписян вургемыштлан куаныме шуэш.
Финн-угор калык-влакын сымыктышышт денат палдарыме. Залыште Моско гыч Анна Чигарован финн-угор мифологийым ончыктышо «Сотворение» манме арт-объектшым вераҥдыме. Тудо кызыт Йошкар-Оласе храмлам роспись дене келыштара.