25 июньышто Кугу Ачамланде сарын участникше Зоя Андреевна Доронина 100 ияш лӱмгечыжым вашлие.
Тудо Морко район Лапшар ялыште шочын. Ешыште 12 йоча лийын, Зоя кудымшо. Тушеч куд икшыве илен кодын, молыжо изишт годымак черланен коленыт. Зоя Андреевнан аваже Агрофена Ивановна Крылова ден ачаже Андрей Захарович Захаров колхоз пашаште тыршеныт. Зоя школышто индеш классым тунемын. Тылеч вара тудым лаборанткылан пашаш налыныт. Сар тӱҥалмеке, складым вуйлаташ шогалтеныт.
1942 ийыште сарыш наҥгаеныт. Тылзе наре Калуга ола воктене санинструкторлан туныктеныт. Тунам 19 ияш Зоя кидышкыже икымше гана автоматым налын. Сусыргышо салтак-влакым кредалме верла гыч луктеден. Сар пытымешке, Зоя Андреевна передовойышто сусыргышо салтак-влакым эмлаш полшен, Берлин марте шуын.
1946 ийыште Сергей Петрович Доронинлан марлан лектын, кугыжаныш банкыште кассирлан тыршен. Сергей Петрович дене 69 ий пырля иленыт, кум икшывым ончен куштен, йол ӱмбак шогалтеныт.
Зоя Андреевна кызытат яра ок шинчылт, крючок дене пидеш, ыресла тӱрла. Морко посёлкысо М.Янтемир лӱмеш тоштерыште, тудын пашажым чумырен, ончерым келыштареныт. Тудым Кугу Ачамланде сарыште сеҥымылан 78 ий темме вашеш ончыктеныт.
«Морко мланде — Моркинская земля» тӱшка гыч налме фото.