Шукерте огыл Йӱдвел Осетий-Аланий Республикысе Ардон олаште «Профессионалы» профессионал мастарлык шотышто чемпионатын регион-влак кокласе иктешлыше этапше лийын. Тушто Йошкар-Оласе строительный техникумын студентше Роман Васильев «Кермычым оптымаш» компетенцийыште той медальым сеҥен налын.
Марий рвезе Йошкар-Олаште шочын-кушкын. Ачаж ден аваже Советский район Шуармучаш ял гыч улыт. Романын йоча пагытше ялыште ачажын могырым коча да коваж дене эртен. Сандене тудо изинек пӧръеҥ пашалан тунем кушкын.
Кызыт Р.Васильев Йошкар-Оласе строительный техникумышто «Зданий ден сооружений-влакым чоҥымаш да эксплуатацийыш колтымаш» специальностьлан кокымшо курсышто заочно тунемеш.
Той медалист
Профессионал мастарлык шотышто чемпионатыш икымше гана ушнен. Эн ончыч республикыште шкенжым сайын ончыктен. Йӱдвел Осетий – Аланийыште эртаралтше иктешлыше этапыштат Марий Элын чапшым волтен огыл. Роман ойла:
– Тыгай чемпионат шуко сай шижмашым луктын. Конкурсант-влак, нунын наставникышт дене палыме лиймеке, вашла паша опыт дене палдаренна. Конешне, сеҥыше радамыш логалаш манын, чыла шинчымашым да моштымашым пышташ кӱлын. Икмыняр модульым ыштыман ыле. Кажныже шкешотан, да кажныжлан жюри посна акым пуэн. Размерым шотыш налман, кермычым оптымо годым эсогыл миллиметрланат йоҥылыш лияш ок лий. Кермыч лончысо коклам чын ыштен моштыман. Лӱдыкшыдымылык правилым шотыш налын, лӱмын ямдылыме станокышто кермычым пӱчмӧ мастарлыкым ончыктенна. Чыла тидым эксперт комиссий тӱткын эскерен. Но эн неле – палемдыме 11 шагат жапыште чыла ыштен шукташ.
Р.Васильевлан наставникше, строительный техникумын преподавательже Татьяна Николаевна Петелина ятыр каҥаш дене полшен, поро ой дене вийым пуэн, тунемшыже сеҥышыш лектеш манын ӱшанен. Тыгак лийын. Шӧртньӧ огыл гынат, той медаль – кугу куан.
Курык коклаште вийым налын
– Чемпионат Ардон олаште эртен. Толмо кечынак мемнам шокшын, кугу уна семын вашлийыныт. Йӱдвел Осетийысе калык поро. Участник-влак национальный кочкыш дене палыме лийынна. Мылам поснак сыран осетин когыльо келшен. Курыкыш экскурсий дене миенна. Пӱртӱс, конешне, мотор. Ӱшанем, тиде кундемыш эше ик гана толаш йӧн лектеш, – манеш студент.
Студент да пашазе
Тунемме деч посна Роман «ПМК-9» чоҥымо компанийын объектлаштыже пашам ышта. Кермычым оптымо мастарлыкшым шуара.
– Шке пашамым йӧратен ыштем. Ик кермыч ӱмбаке вес кермычым пыштен, кугу пӧрт чоҥалтеш. Але вара тиде ок кумылаҥде?! – шыргыжал каласыш самырык мастаръеҥ.