Тыге ойла шке пашаж нерген электрогазосварщик Виталий Ишкатов.
Сварщик – неле да ответственный паша. Тудын шке сомылжым кузе шуктымыж дене чоҥымо конструкцийын кужун чытымыже да пеҥгыдылыкше, оборудованийын ӱшанлын пашам ыштымыже да еҥ-влакын лӱдыкшыдымылыкышт кылдалтын. Сварщик пашам чот йӧратыше, чулым да чытышан лийшаш. Лач тыгаяк койыш-шоктышан «Водоканал» обществын электрогазосварщикше Виталий Ишкатов.
Тудо Удмуртийысе Киясово районысо Кумырса изи ялыште шочын. Аваже фермыште пашаште шуко жапым эртарен. А тудын укеж шеҥгеч рвезе сурт кокласе уло пӧръеҥ сомылым ышташ тунемын. Тунамак Виталийым чонжо технике деке шупшын, тудын кузе ышталтмыжым, кузе тудым ачалаш лиймым пален налаш оҥай лийын.
Виталий Буймо школ деч вара Ижевск оласе профессионально-технический училищыште электрогазосварщиклан тунемаш шонен пыштен. Выпускной экзамен-влакым сайын кучымек да дипломым налмек, Агрызыш толын. 2006 ий годсек «Водоканал» обществыште ышта. Ондак тудым вӱдпучым олмыктышылан налыныт, а 2000 ий гыч электрогазосварщиклан шотлалтеш. В.Ишкатовлан пашаже келша.
– Нелылык чыла вере уло. Но шуктымо сомылышкет уло чонетым пыштет гын, кеч-могай пашат ушнен толеш, – ойла тудо.
А вет южгунам тувраш йымалнат, кӱкшытыштат, кийышылат шке пашам шукташ логалеш. Поснак телым уремыште ышташ неле.
Молан сварщик профессийым ойырен налынат манын йодмылан Виталий кӱчыкын вашештыш:
– Тыгай специалист эре кӱлеш, пашадарымат сайын тӱлат.
Виталийын пашам кузе ыштымыжым ончет да умылет: сварке тудлан тыглай паша гына огыл, а чылт искусство. Арам огыл кажне сварщикын шке почеркше манын ойлат. Виталийынат тыгак. Кӱртньӧ ушыктышым (шов) моторын, мастарын ышташ манын, могай чот сайын кӱртньым да электродым шижман!
– Чылажат опыт дене толеш, – манеш сварщик. – А эше сай, кунам кугурак йолташ-влак улыт, нуно эре полшат, ой-каҥашым пуат.
– Виталий Анатольевич пашам ышташ эре ямде, – ойла предприятийым вуйлатыше Ильдус Шаймухаметов. – Кӱлеш гын, каныш кечынат лектеш але паша смене деч варат кодеш. Кеч-могай идалыкыште да кеч-могай игечыште аварийно-восстановительный пашам шуктымашке кудалеш. Тудын кидше шӧртньӧ, садлан паша лектышыжат куандара.
В.Ишкатов мӧҥгыштат яра ок шинче, сурт коклаште тӱрлӧ сомылым шукташ йӧрата. Лейсан пелашыж дене шке пӧртым чоҥеныт, сад-пакчам кучат. Ишкатовмытын ешышт кугу, кум шочшан улыт, йоча-влакымат пашалан кумылаҥдат.
– Шке пашамым моткоч йӧратем. Тыгай профессийым шке ойырен налынам, но тидын шотышто ик ганат ӧкынен омыл. Мылам келша, кунам икмыняр ужаш гыч ик тичмаш шочеш, – ойла Виталий.
Чеверласенат ышна шукто, тудо чурийышкыже маскым волтыш, кидышкыже электродым нале, да икмыняр секунд гыч чыла могырыш тул фонтанла шыжалте, сварщик йӧратыме пашажым шукта.
Наталья Муфтахутдинова.
Татарстан кундем.