28 декабрьыште Кинон тӱнямбал кечыжым палемдат. «Путёвка в жизнь» йӱкаҥдыме икымше совет киношто тӱҥ геройын рольжым Марий кундемын шочшыжо Йыван Кырла модын. Тушто тудо эше марий мурым йоҥгалтарен.
Куандара, кызытат Российысе кинематографийыште Марий Элыште шочын-кушшо икмыняр марий еҥынат лӱмжӧ йоҥгалтеш. Нунын кокла гыч иктыже – Пётр Кожевников.
(«Против всех» сериал гыч. Палыме артист Н.Добрынин дене)
Пётр Кожевников Йошкар-Олаште Тӱвыра да сымыктыш колледжыште театр да кино артист специальностьым налын. Тунеммыж годымак тӱрлӧ вере шкенжым шуарен. Тунамак студентмытлан шкешт нерген изирак документальный кином ямдылыман да войзыман улмаш. Тидланже самырык артист-влак шулдыраҥыныт веле. Кеч ты паша усталык йыжыҥыштышт профессионал паша семын шотлалтын огыл гынат, кино аланыште шкем терген ончымаште икымше ошкыл лийын.
Колледж деч вара самырык артистын профессионал корныжо Татарстан кундемысе Бугульма оласе А.В.Баталов лӱмеш кугыжаныш руш драмтеатрыште шуйналтеш. Пётр ныл ий театрыште модеш. Тидыже артистлан мастарлыкшым нӧлтымаште, профессионально кушмаште, ончышо-влак дене кылым пеҥгыдемдаш полшымаште сай шӱкалтышым ышта. Садлан П.Кожевников Бугульма оласе театрлан усталык корныжым тапташ полшымыжлан кугу таум веле ойла.
2010 ийыште Пётр шке шочмо-кундемышкыже пӧртылеш да Республикысе курчак театрыште пашам ышташ тӱҥалеш. Ты жапыштак Марий самырык театрыште, Марий Эл Радиошто тырша. Каласыман, тыгодымак Марий Элыште режиссёр А.Федорченкон «Небесные жёны луговых мари» фильмжым войзеныт. Пётр ты проектыш ушна. Тидыже тудын карьерыштыже икымше профессионал кино пашаже лиеш.
– Тылеч вара киношто сниматлалташ кумылем утларак шочын. Ты шонымаш ушышкем кӱлынак шыҥен да тудым илышыш шыҥдараш, театрым коден, Москош каенам. Кугурак олаште киношто войзалташ кастинг-влак шукырак эртат. Тыге мый тӱрлӧ кастингыш кошташ, проект-влакым эскераш тӱҥалынам. Тӱрлӧ пробым эртымеке, мыланем «Власик» фильмыште НКВД пашаеҥын рольжым модаш ӱшаненыт. Тидыже кугу олаште икымше кугу проект лийын. Тылеч вара «Универ», «Реальные пацаны», «Интерны», «Прокурорская проверка» «Кодекс чести», «Братаны», «Земский доктор» сериаллаште изирак роль-влакым модынам, – каласкалыш Пётр.
– Карьерым чоҥымо годым тӱҥалтыште могай нелылык дене тӱкненда?
– Тыште кастинг шотышто, очыни, эн кугу нелылыкше шижалтеш. Вет тӱҥалше артист тудым шке кычалшаш, а нуно шукыжым закрытый улыт. Но кычалше еҥ эре муэш, тидыжым пеҥгыдын каласен кертам.
– А сценарийым писын тунемман. Тидлан ятыр жап кӱлеш?
– Театр дене таҥастарымаште киношто икмыняр дубльым ышташ йӧн уло. Театрыште кок шагат але утларак эртыше спектакльым ик дубльышто модат гын, киношто тыге огыл. Сандене тидын шотышто нелылык огеш шижалт. Киношто сценыжат изирак, эпизодшат кӱчыкырак улыт. Сцене-влак коклаште эше перерыв-шамыч лиедат. Ты жапыште сценарист-влак тулым келыштарат, камерым шындылыт гын, артист-шамыч рольым репетироватлат. Тыгак палыман, кино артист-влак эре камер йымалне пашам ыштат. Сандене ик уто движеният кадрым локтылын кертеш.
– Тыланда утларак могай роль-влакым модаш келша?
– Роль кеч-могай лийже, тудым чоҥыман. Тидыже артистын тӱҥ задачыжлан шотлалтеш. Сандене артистлан ончыч рольым шижын, шке деке лишемден моштыман. Тыге веле тудым ончышылан тичмашнек да сайын намиен шукташ лиеш.
– Киносо икмыняр ойыртем нерген ала палдареда ыле?
– Киношто театр семын йӱкым утыжым кугемден модман огыл. Тыште микрофон-влакым чӱктымӧ, адакшым модмо кумдыкат утыжым кугу огыл. Чылажат рашын да йоҥгыдын шокта. Илышым кузе илет, киноштат тугак модман. Мутлан, ме икте-весе дене илышыште кузе мутланена, киноштат тыгак ыштышаш улына.
– Тачысе кечылан кино тыланда мо? Да могай верым тудо илышыштыда айла?
– Икымше верыште, мутат уке, еш. Тудо илышыштем тӱҥ верым налеш. Вара – театр, шонем. Содыки, тудын деч посна мый илен ом керт. Ынде ятыр ий Моско оласе Е.Махонина лӱмеш драмтеатрыште пашам ыштем. А кумшо верыште кино манын кертам. Тудат илышыштем кугу верым айла. Садлан яра жапем лийме годым тӱрлӧ кастингыш ушнем, пробо-влакым колтылам, киношто сниматлалтам.
– Рольлан кӧра вашталташ, съёмко площадкыште йӱдшӧ-кечыже илаш логалын?
– Лийын тыгай. «Против всех» сериаллан ӱпым тӱредыман ыле. Ӱмаште ик кугу проектыште сниматлалтынам. Тудым пел ий наре войзенна, садлан площадкыште «иленна» – манаш лиеш. Ты проект кок тургыман, 26 сериян. Тушто элнан ятыр лӱмлӧ артистше дене икте-весылан эҥертен, пашам ыштенна. Тыгак икмыняр гана тылзе але утларак жаплан мӧҥгӧ гыч вес олалашке каяш логалын.
– Тӱҥалше артист Пётр Кожевниковлан кызыт могайрак тыланымашда лиеш ыле?
– Илышыште кеч-могай ситуаций лийже, нигунам вуйы ит саке. Ончыко сай кумыл да шонымаш дене ончо. Кажне еҥын шке илыш корныжо, садлан тудын дене пеҥгыдын ошкылман. Тидланже ум кычалман, тунемман, мо эртен шеҥгелне кодыман.
Артист-влакын яра жапышт укеат, манаш лиеш. Нуно тылзе дене тӱрлӧ проектыште сниматлалтыт. Санденак, очыни, ты жапым чот аклат да тудым сайынак эртараш тыршат. Тыгай йӧн лийме годым Пётр Кожевников шочмо ялышкыже Советский район Кельмаксолашке вашка. Шочмо кундемын, суртын, пӱртӱсын вий-куатышт артистлан вийым ешарат.
П.Кожевниковын альбомжо гыч налме фото-влак.
П.Кожевников деч саламлымаш:
Чылалан пеҥгыде капкылан, таза лияш тыланем. Вӱта тич вольыкда, ӱстембалныда эре кинде-шинчал лийышт. Ешыште йӧратымаш да умылымаш, чонышто ласкалык озаланышт. Тӱҥжӧ – пиал дене темже шӱмда!