27 январьыште Марий Эл Республикысе Калык-влакын келшымаш пӧртыштышт Депутатын кечыже лийын.
Тудым Марий Эл Республикын Кугыжаныш Погынжо «Российысе калык-влакын ассамблейышт» мер-кугыжаныш организацийын регионысо пӧлкаж дене пырля эртарен. Мероприятий Российысе калык-влакын икоян улмо идалыклан пӧлеклалтын да 150 утла участникым иквереш чумырен.
Тӱҥ каҥашыме темыже – 2026-2036 ийлан Российысе Кугыжаныш национальный стратегий. Ты пашашке Марий Элысе парламентын еҥже-влак, Кугыжаныш Думын депутатше Сергей Казанков, пошкудо Чувашийын делегацийже, «Герои Марий Эл. Талешке-влак» программын участникше-шамыч, кучемын органже-влакын еҥышт да молат ушненыт.
Эн ончычак погынышо-влаклан Российын сулло сӱретчыже Иван Ямбердовын ончержым да Т.Евсеев лӱмеш Национальный тоштерын тӱрлӧ калыкын вургемжым ончалаш темленыт.
Марий Эл Кугыжаныш Погынын Председательже Михаил Васютин заседанийым почмо годым икте-весе дене келшен илыме сай пример семын СВО участник-влакым палемден. Тудо Марий Элыште 50 утла калык икте-весыштын тӱвыраштым, йӱлаштым, йылмыштым пагален ила да нунылан тӱрлӧ законым лукмо дене полшен шогена манын каласен.
«Российысе калык-влакын ассамблейышт» регионысо организацийын пашаж нерген тудын вуйлатышыже Лариса Яковлева каласкален. Тӱвыра, печать да калык-влакын пашашт шотышто министрын алмаштышыже Александр Луничкин национальный пайрем-влакын, тӱрлӧ фестиваль ден форум-шамычын келшен илымаште рольышт нерген ойлен.
Самырык тукымын ушнен шогымо сомылжым Молодёжный парламентын национальный политике ден тӱвыра-влак кокласе вашкыл шотышто комитетын председательже Мусаниф Моллачиев ден ПГТУ-н ректоржо Игорь Петухов радамленыт.
Чувашийысе Госсовет Председательын алмаштышыже Ольга Петровалан мутым пуымеке, тудо Марий Элысе кугыжаныш национальный политикын пашаж дене палыме лийме шотышто йӧным пуымылан тауштен. Ты мероприятий деч вара чуваш делегаций Марий Эл Кугыжаныш Погынын паша верыштыже лийын.
Депутатын кечыжым иктешлен каласаш гын, Российын икоян улмыжым пеҥгыдемдаш калык-влакын пырля да икте-весым пагален пашам ыштымышт, историйысе чыным ончыктымышт да элнан ончыкылыкшо верч мутым кучен илымышт полшат. Мероприятий мучаште ойыртемалтше-влаклан наградым да пеледыш аршашым кучыктеныт.