Российын Геройжо, старший лейтенант Дамир Шаймардановын ӱмыржӧ 2022 ий 30 апрельыште Харьков областьысе Изюм ола воктене Долгенькое села верч кредалмаш годым кӱрылтын. 23 ияш рвезе патырлыкым ончыктен да тул йымаке пураш лӱдын огыл, йолташыже-влакын илышыштым арален коден.
Эртыме корно
Дамир 1998 ий 2 августышто Йошкар-Олаште шочын. Эн ончыч 29-ше номеран школышто тунемын. 9-ше класс деч вара Йошкар-Оласе А.С.Пушкин лӱмеш 4-ше номеран гимназийыш куснен.
2016 ийыште Озаҥысе кӱшыл танковый командный училищын курсантше лийын. Тудым 2020 ий 9 майыште тунем пытарымеке, Дамир Шаймардановым Брянск областьысе Клинцы олашке колтат. Эн ончыч танковый взводын командирже лийын. А 2022 ий январьыште тудым 20-шо гвардейский общевойсковой армийын (Касвел военный округ) 144-ше гвардейский моторстрелковый дивизийын 488-ше мотострелковый Симферопольысо Серго Орджоникидзе лӱмеш Суворов орденан Краснознамённый полкшын танковый ротын командиржылан шогалтеныт.
2022 ий 24 февраль годсек Д.Э.Шаймарданов шке подразделенийже дене пырля специальный военный операцийыште Донецк ден Луганск Калык Республиклам аралымаште лийын. Апрель кыдалне нуно Харьков областьысе Изюмский районышто кредалыныт. Украинын Вооружённый Вийже Российысе войска-влаклан Славянск (ДНР) направленийыште ончыко каяшышт кугу чаракым ыштылын. Д.Шаймарданов 2022 ий 30 апрельыште Долгенькое селам утарымаште Российысе военнослужащий-влакын колонныштым вуйлатен. Дамир, шке йолташыже-влакым аралышыла, тушманын тулжо коклаште героически колен.
Орденым пуэныт
Дамир Эдуардович икымше кече гычак шкем лӱддымӧ салтак да ӱшанле йолташ семын ончыктен. Патырлык орденым пуымо наградной листыштыже тудын нерген тыгерак возымо:
– 2022 ий 24 февральыште Д.Э.Шаймардановын вуйлатымыж почеш танковый рото Гусинка ял могырышто чулымын ончыко каен, ВСУ-н танковый подразделенийже-влакым блокироватлен. Нунышт Гусинка кӱртньыгорно станций деке каяш чаракым ыштеныт. Шаймарданов, шке шинчымашыжым кучылтын, шындыме задаче-влакым шуктен да тушманын тулан точкыжо-влакым рашемден – тидыже тунамак нуным пытараш полшен. Тунам тулан атакыште ваштареш шогышо армийын икмыняр танкшым, ятыр офицержым пытарыме. Чыла тидыже подразделенийысе подчинённыйжо-влакым кӱлеш семын виктарен моштымылан кӧра лийын. Тылеч варат офицер операцийым вуйлатен да вуйлатымыж дене кок танкым пудештарыме. А личный состав илыше кодшо манын, чотак азапланен да тидым ыштен кертын.
Подвигше ятырак
2022 ий 13 мартыште Д.Э.Шаймардановын экипажше Топольское селам налме годым танк дене тушманын кок бронетехникыжым пытарен, пленыш ик экипажым налын. Тыгак 15 мартыште 18 шагатлан миномёт лӱйкалыме годымак сусыргышо-влакым эҥер вӱд дене вес могырыш эвакуироватлен. Тыгодым Дамир сусырген, но госпитализацийыш ом кай манын.
31 мартыште Малая Камышеваха селам налме годым кредалмаште ротын командирже, лейтенант Д.Э.Шаймардановын Т-72 Б3М танкышкыже тушманын противотанковый управляемый ракетшын (ПТУР) расчётшо логалын, йӱлаш тӱҥалын. Но рвезе кредалмым чарнен огыл, тушманын кок тулан вержым, ПТУР-ын расчётшым да танкшым пытарен шуктен. Тыге мотострелковый подразделенийысе личный составым арален коден да ончыко каяш полшен.
30 апрельыште Дамир, Долгенькое села воктене танковый взводан штурмовой отрядым вуйлатышыла, кӱкшакам налмаште боевой задачым шуктен. Танкын экипажше Шаймардановын моштен вуйлатымыжлан кӧра 3 танкым, 2 БТР-ым да тушманын пехотыжым взвод марте пытарен. Боевой машиныже ятыр вере пудырген, тӱҥ орудийжымат йомдарен. Лейтенант Шаймарданов сусырген да контузитлалтын, но отрядым вуйлатымым чарнен огыл. Тудо пудыргышо танк дене уремым петыраш кӱштен, тыге тушман воктенак лийше мотострелковый подразделений вес позицийыш чакнен, варажым тушманым пытарен кертын. Экипажлан танк гыч каяш приказым пуымекыже, Дамир шке тушеч лектын огыл, но тушман ваштареш шоген: боевой машинан пулемётшо дене пудештаркален.
Варажым йолташыже-влак командирыштым танк гыч вуйушым да шуко вӱрым йомдарышым луктыныт. Но транспортыш пуртымышт годым противотанковый мине пудешталтын. Тыге Д.Шаймардановын илышыже кӱрылтын. Землякна офицер лӱмжым иканат шӱктарен огыл, кеч-куштат лӱддымылыкым ончыктен, шке илышыжым Шочмо элна верч пуэн да салтак-влакым эре кумылаҥден шоген.
Рамкыш:
— Озаҥысе танковый училище воктене выпускникше да Российын 11 Геройжо-влак коклаште Д.Э.Шаймардановын бюстшым вераҥдыме;
— Брянск областьысе Клинцы олаште Геройын служитлыме частьыште стелым шогалтыме;
— Йошкар-Оласе А.С.Пушкин лӱмеш 4-ше №-ан гимназийыште шарнымаш знакым вераҥдыме;
— Йошкар-Оласе 29-ше №-ан школлан Д.Э.Шаймардановын лӱмжым пуымо, пырдыжыштыже шарнымаш оҥам пижыктыме;
— «Юнармия» толкынын Йошкар-Оласе пӧлкажлан Геройын лӱмжым пуымо.