Россий ФСИН-ын Марий Эл Республикысе 4-ше №-ан колонийышкыже самырык специалист толмылан пел ият эртен огыл. Туге гынат Диана Михайлова коллективыште пагалымашым сулен.
Августышто Диана 4-ше №-ан исправительный колонийын охране пӧлкашкыже службыш толын. Тудлан опытан пашаеҥ-влак полшен шогат, туныктат.
ТУНЕММЕ ПАГЫТ
Школым тунем пытарымеке, Диана Россий ФСИН-ын Самара оласе юридический институтышкыжо тунемаш пурен. Ты профессийым ӱдыр нимо уке гыч ойырен налын огыл. Д.Михайлован аваже Марий Эл Республикысе 7-ше №-ан исправительный колонийыште кинолог-инструкторлан пашам ышта. Сандене ты алан дене Диана изиж годсек палыме.
Ӱдыр кызытат «Юный страж закона» йоча конкурсышко ушнымыжым шарна, сеҥен налме медальжым арала.
Самара оласе институт деч посна МарГУ-шко тунемаш йодмашым пуэн улмаш. Кок вережат вступительный экзаменым сайын кучен, спорт дисциплине денат нелылык лийын огыл. Туге гынат ӱдыр вес кундемыш каен. Вич ий гыч «Юриспруденций» специальностьым налын.
– Йошкар диплом дене тунем лекташ нимо нелыжат лийын огыл. Тыште икте веле кӱлеш – тыршымаш. Мый материалым вашке шарнен кодам, садлан чылажат куштылгын пуалтын. «Уголовно-исполнительное право» предметым эн йӧратымылан шотлем, а эн пагалыме туныктышем – Ксения Ивановна Голубцева. Тудын лекцийже-влак оҥай лийыныт, – палдарыш Диана.
Тунемме пагытыштыже ӱдырын кок «нылытан» веле лийын, молыжо – «визытан». Дипломым сайын арален. Но пандемийлан кӧра тиде чон вургыжмо татым да куан кумылым тичмашнек шижаш йӧн лийын огыл.
– Диплом пашам ме дистанционно, мӧҥгыштӧ араленна. Кугурак ийготан йолташ-влакын ойлымышт почеш, мемнан чыла куштылгын эртен. Но выпускной касын ямжым шижын огынал. Диплом-влакым мыланна УФСИН-ыште кучыктеныт. Чыла пайрем семын эртен гынат, ала-мо ситыдымыла чучын, – ойла Д.Михайлова.
ПАША
Диана кызыт моло семынак дежурствыш коштеш, документ дене шинчылтеш да пашалан эркын тунемеш.
– Институтышто туныктышын пуымо теорийже да кече еда тӱкнымӧ йодыш-влак ойыртемалтыт. Адакшым тыгай нелылык мемнан дене гына огыл, моло аланыштат вашлиялтеш, очыни. Мемнан пӧлкасе офицер-влаклан кугу тау. Колоний вуйлатышын алмаштышыже Андрей Валерьевич Смирнов да мыйын наставникем Сергей Иванович Полянин мыланем эре полыш кидым шуялтат, мом ом умыло рашемдат. Коллективыште мыйым «дочь полка» манын лӱмдат. Тидыже мемнан кокласе вашкылымат ончыкта, шонем, – каласыш самырык специалист.
Ӱдыр службо пашан чыла шӧрынжылан тунемеш веле гынат, шке мастарлыкшымат тергаш жапым муэш. Шукерте огыл «Мисс УИС» конкурсын республикысе этапыштыже выступатлен. Тушто «Профессионализм Мисс» номинацийыште сеҥышыш лектын. Тылеч посна элгӧргӧ службын лейтенантше уэш тунемаш пурен. Ынде МарГУ-што «Юриспруденция в органах местного самоуправления» направлений дене магистратурышто шинчымашыжым пойдара. Икымше сессийым чыла визытан дене петырен.
Ӱдыр Медведево район Пиясир (Кузнецово) селаште шочын-кушкын. Моло семынак школышто тунемын, а яра жапшым спортлан ойырен. Диана футболым йӧратен, эсогыл вич ий «Мариэлочка» футбол командыште пурла могыр защитник лийын. Но командыште улмо шуко вийым да жапым йодын: тренировко, вес кундемлаш кудалыштмаш. Спорт аланыште ӱдыр вияҥын гын, тунеммаште вараш кодын, отметке-влакат шӱлыкаҥденыт. Тунам Михайловмыт ешыште тиде йодышым каҥашеныт да команде гыч кораҥаш кутырен келшеныт.
Шонымашыш шуаш тыршыше, чолга койыш-шоктышан ӱдыр – шуко еҥлан да коллегыже-влакланат пример.
Россий ФСИН-ын Марий Эл Республикысе управленийжын пресс-службыжын полшымыж дене ямдылыме.