Изи Какшан эҥерыште Йошкар-Оласе аварийно-утарыше службын, УВД-н да ола администрацийын пашаеҥышт рейдым эртареныт.
Ий ӱмбак лекше колызо-влак дене мутланеныт да лӱдыкшыдымылык правил-влакым ушештареныт. Специалист-влакын ойлымышт почеш, ий але чот кылмен огыл, сандене колым кучаш лекташ ида вашке. Уке гын модыш гыч лодыш лийын кертеш. Мутлан, 19 ноябрьыште Медведево районышто ТЭЦ-2 воктене колым кучаш лекше 69 ияш пӧръеҥ вӱд йымак каен колен.