22 мартыште Параньга кундем Кугу Пумарий селасе тӱвыра пӧртыштӧ Игорь Гориновым шарныме лӱмеш «Лач тиде омо…» фестиваль-конкурс эртаралтын. Тушто 14 гыч 35 ияш марте самырык гармонист-влак шке мастарлыкыштым тергеныт.
Игорь шкежат гармонь дене устан шоктен, муро-влакымат возен. Специальный военный операцийыштат тиде семӱзгар дене шоктымыжо, мурымыжо дене йолташыже-влакын кумылыштым нӧлтен. Чаманен каласыман, 2024 ий март тылзыште чолга рвезе Игорь Гориновын ӱмыржӧ кӱрылтын.
Тудым шарныме лӱмеш эртаралтше фестиваль-конкурсышко тудын йолташыже, лишыл еҥже-влак ушненыт. Гран-при дене – у гармонь дене – Параньга район, Олор ял гыч Иван Ороспаев палемдалтын.