Марий калыкын ик эн йӧратыме концертше тений 5 февральыште лиеш. Но чылалан палыме амаллан кӧра тений тений тудо онлайн йӧн дене эртаралтеш. Эртыше идалыкыште марий муро аланым пойдарыше эн ойыртемалтше мурызо ден автор-влакым чумырышо пайрем концертым кузе ончаш лиеш? Ямдылалтме пагыт кузерак эрта? Нине йодыш-влаклан Марий Эл радион тӱҥ редакторжо Володя Матвеев тыге вашештыш:
– Тений мурызо ден автор-влак Э.Сапаев лӱмеш марий кугыжаныш академический опер да балет театрыште погынат. Концерт 19 шагат гыч 22 шагат марте шуйна. Вияш трансляцийым палемдыме жапыште МЭТР телеканалыште, Марий Эл радион да МЭТР телеканалын Ютубысо лаштыклаште, Марий Эл радион Вконтакте социал кылысе тӱшкаштыже ончаш лиеш. Тылеч посна тиде концертым Марий Эл радион эфирыштыже колышташ лиеш.
Тыгай онлайн концертым икымше гана эртарена. Мыланна тиде – у йӧн, но тыге ме шкенам тергена, уло кумылын ямдылалтына. Телетрансляцийын шке ойыртемже уло, тидым шотыш налын, сценарийым келыштарена. Такшым оҥай лиеш манын шонем. Концертыште 30 утла мурызо лийшаш. Тыгак ончычсо семын автор-влакым саламлаш тӱҥалына.