Кодшо ийын Марий Эл Радиошто йоҥгышо муро-влакым тений Э.Сапаев лӱмеш опер да балет театрын сценыштыже онлайн концерт дене иктешлыме.
В.Матвеев, Марий Эл радион тӱҥ редакторжо:
– «Идалыкысе муро» фестивальын ойыртемже могай? Ты гана артист ден вӱдышӧ-влаклан заллан огыл, а камер ончылно пашам ышташ, телекӱварым, видеопереключений-влакым ышташ тунемман ыле. Весе: нигӧ ок воштыл, рӱж совым кырымым от кол, сандене йӧндымылык шочеш. Моло шотшо тугаяк: тургыжланыме, ямдылалтме. Ик колыштшо але ончышо еҥ тидлан оксам тӱлен огыл, тиде шкешотан пӧлек дене калыкын кумылжым нӧлталме.
Чылаже 32 муро йоҥген. Гран-прим ме кодшо идалык мучаштак палемденна ыле – тудым Игорь Антроповлан пуымо. Качери бавайын «Антивирус муро» онлайн конкурсышто сеҥен. Тушто пандемий жапыште ола ден яллаште мом ыштыме нерген таҥастарен ойлымо. «Интернет-йӱклымашыште» Евгений Иванов «Марий мланде – шочмо вер» муро дене ойыртемалтын. Радио эфирыште Марина Иванован «Шочмо кечет дене, ковай» мурыжо эн шуко йӱкым поген.
И.Антропов, Гран-прим сеҥен налше:
– Тиде – илышыште сеҥен налме икымше Гран-при. Статуэткым кучыктышт. Мый театрыште пашам ыштем да палем: тыгай сеҥымашыш коллегем-влак – Иван Смирнов, Светлана Строганова – шуыныт. Мо оҥайже: ӱмаште Гран-прим Иван Смирновын «Вате койыш» мурыжлан пуэныт. Тудынат, мыйынат муремлан семым Евгений Анисимов возен. Туддене ме шукертак палыме улына. Шернур посёлкышто илыме годым пошкудо лийынна, вашла унала коштынна. Вашлийме годым Евгений Иванович ты мурым гитар почеш муралтыш. Мылам келшыш, да тудым уэмден, аранжировкым ямдылышна. Кызыт кум мурем уло, лишыл жапыште ты композиторын возымо «Шошо сем» муро лекшаш. Тудат лыжга, ойыртемалтше семан.
Т.Пчёлкина, поэтессе:
– Мыйын шомаклан возымо муро-влак кажне ийын гаяк ты фестивальыш логалыныт, южгунамже икте гына огыл. Кажне гана у муро лийын. Нуным «Вената» дуэт, Роза Искакова, Эльвира Попова, Лариса Сидоркина, Марина Садова да молат йоҥгалтареныт. Татьяна Денисова «Каенат» ден Эльвира Трифонова «А мый йӧратем» муро-влак дене Гран-прим налыныт ыле. Композитор Иван Ильич Егоров дене пырля пашам ышташ келша. Семым колтат да возем, кызыт Татьяна Фоминых да Аделина Батаева дене мурым ямдылена. Шукерте огыл эше кок мурызо мыйын шомаклан возымо мурым Марий Эл радиош пуэн.
Ты пӧлеклан марий калык куанен, шонем. Мыняр еҥ тидым ончен – рашемдаш ыле. Чыла мурызылан, авторлан, вӱдышылан таум каласыме шуэш.
Эльвира Терентьева.