Май кыдалне Сургут олаште эртыше «Хрустальная корона Югры – 2023» конкурсышто марий ӱдыр Вероника Алетдинова мисс лӱмым сулыш.
Вероника Пӱрӧ олаште шочын. Но изи улмыж годымак ачаж ден аваже аважын Шочмо Кӱрзе ялышке (Мишкан район) илаш кусненыт. Ӱдыр, тысе школым тунем пытарымеке, Уфаште Мифтахетдин Акмулла лӱмеш педуниверситетым кок йошкар диплом тунем лектын: бакалавриатым воспитательлан да магистратурым психологлан. Ик жап Уфаште психологлан ыштымеке, 2020 ийыште Сургут олашке илаш куснен. Кызыт тыште «Аленький цветочек» йочасадыште тырша.
– Мый эреак иктаж тыгай конкурсыш ушнаш шоненам. Но конкурсыш шукыж годым 90х60х90 параметран, кужу капан ӱдыр-влакым вучат. А мый кӱчыкырак капан марий ӱдыр улам. Икана Соцсетьыште «Хрустальная корона Югры» конкурс нерген уверым ужым да возен колтышым. Тушто каласышт: тӱҥжӧ еш поянлыкым, национальный культурым ончыктыман. Чот куанышым: вет мый марий калыкем нерген палдарен кертам. Тыге ямдылалташ тӱҥальым. Мишкан РДК гыч тувырым заказатлышым, шкеак сӧрастарыме ӱзгар-влакым паша деч вара але пашаште яра жап годым ыштенам. Пелашем пеш чот полшыш. Коктын гаражыште вӱдварам пӱчкын лукна, ведра-влакым чиялтышна, – ойла Вероника.
Ӱдыр конкурс годым марий ӱдырамаш нерген видо, марий сем да марий куштымаш, шке сӱретлыме сӱретше гоч каласкален. Жюри тидым кӱкшын аклен.
А 10 июньышто Вероникам эше ик куан вуча: тудо йӧратыме таҥжылан марлан лектеш. «Конкурсышто сеҥымаш ӱдыр пагытым ужатыме гаяк лие», – палемдыш тудо. Чыла шотыштат чолга да пиалан лий, Вероника. Марий улметым нигунам ит мондо.
Ирина Степанова.