Хореограф ритмым шижшаш

Шернур район Купсолаште илыше кум изак-шоляк Шабдаровмытын мастарлыкышт кундемыштына веле
огыл, пӱтынь элна мучко чапланен. Шуко шочшан ешыште чылан гаяк кушташ тале улыт. Нуным ты сомыллан авашт Татьяна Эриковна Шабдарова кумылаҥден шога. Ты ешыште икшыве-влак семым шижаш, капкылым лывыргын кучаш изинек тунемыныт. Рвезе-влакын Александра акашт (кумшо ӱдыр, ешыште чылаже – шым йоча) кум ияшак кушташ тӱҥалын.  Александра Соловьева (2022 ийыште марлан лектын да пелашыжын
фамилийжым налын) Марисола кыдалаш школышто шинчымашым поген. Тунеммыж годым «Топотушки»,
«Грация» куштымо кружоклаште мастарлыкшым нӧлтен. Кружоквлакым аваже Татьяна Эриковна вуйлатен.
Тылеч посна ӱдыр Йоча сымыктыш школышто шуаралтын. Туштат чолгалыкше дене ойыртемалтын. Тӱрлӧ спорт таҥасымашышке кумылын ушнен, сеҥышевлак радамыште ятыр гана лийын. Школышто Александралан физике предмет моткоч келшен. Садлан 9-ше класс деч вара ты предметым келгынрак тунемаш да тудын дене
кылдалтше профессийым ойырен налаш шонымашыже лийын. Но куштымашым йӧратымаш тудым Йошкар-Оласе И.С.Палантай лӱмеш тӱвыра да сымыктыш колледжыш хореографлан тунемаш пураш таратен.

–  Ончыкылык профессийым ойырен налме шотышто шуко шонкаленам. Авамын корныжым умбакыже шуяш шонен пыштышым. Колледжыште тунемме годым ятыр ансамбльын участникше лийынам. «Эрвел марий» коллектив дене элнан тӱрлӧ олаштыже выступатленна. Тыгак Белоруссийыште фестивальыште мастарлыкнам ончыктенна, – мане А.Соловьева. Александра колледжым 2020 ийыште тунем лектын. Ты жапыште тудо шкенжым хореографпостановщик семынат терген ончен. Идалык гыч Марий кугыжаныш университетыш шке
специальностьшо дене тунемаш пурен. Кызыт кокымшо курсышто тунемеш. «Цармис» куштымаш театрын участникше. Тыгак студентвлакын «Салика» куштышо ансамбльыштышт кушта. Нине коллективвлак Марий Элыште да Российын тӱрлӧ олаштыже выступатлат, ятыр конкурсышто мастарлыкыштым тергат. Шуко творческий таҥасымаште сеҥыше лийыныт.
– Чонемлан калык куштымаш-влак келшат, поснак – марий калыкын. Садлан нуным эреак шымлем, молангынат тунемам. Фестивальыште, форумышто лийме годым шочмо калыкын тӱвыражым аклаш, тудым йӧраташ эшеат кумылаҥат. Самара олаште «Студенческая весна-2022» фестивальыште лийынам. Тыгак «iВолга-2022» форумышто, Юл кундемысе калык-влакын «Объединяя традиции» тӱвыра ф е с т и в а л ь ы ш т ы ш т участвоватленам, – палдарыш ӱдыр. Яра жапшым ешыже, пелашыж дене эртараш йӧрата. Тунемме деч изиш каналташ манын, книгам лудаш, пазлым погаш кумылан. Тыге вуй да капкыл канат, манеш. Хореограф профессий тудлан куштылгын пуалтеш але уке йодмемлан тыгерак вашештыш: – Мый изинек тидын дене илем. Тидлан школыштат, колледжыштат тунемынам, садлан уто нелылыкым ом шиж. Но ик верыште шинчен, илыш дене тӧр каяш, ум пален налаш огеш лий. Садлан тидын шотышто ешартыш шинчымашым эреак налаш тыршем. Хореографият вияҥеш, ончыко кая. А сай хореограф лияш манын, эн ончыч ритмым шижын моштыман.
Тыгак чытыше, йодшо, коллективым ик ешыш ушен кертше да тудым ончыко вӱден наҥгаен моштышо лийман.
А.Соловьеван архивше гыч налме фото.