Хасанов урем Йошкар-Оласе тошто автовокзал кумдыкышто верланен. Тудо Гагарин проспект гыч тӱҥалеш да Карл Маркс урем марте шуйна.
Урем кужу огыл, илыме пӧрт-влак пел могырыштыжо гына улыт.
Ты уремлан 55 ий ончыч еҥ-влакын йодмышт почеш Йошкар-Оласе депутат-влак советын исполкомжын пунчалже негызеш Нужъял корнын кумшо меҥгыжлан Совет Ушем Герой Хаким Хасановын лӱмжым пуымо.
Х.Х.Хасанов 1916 ийыште Тат-Кушна ялыште (кызыт Морко районыш пура) шочын. Школ деч вара кӱртньыгорным ыштымаште тыршен, 1935-1937 ийлаште Йошкар Армийыште служитлен. 1942 ий август гыч – Кугу Ачамланде сарын фронтыштыжо. 1943 ий 12 сентябрьыште Курский область Нехаевка села верч кредалмаште нелын сусырген, немыч-влак тудым пленыш налыныт да орландарен пуштыныт. 1943 ий 17 октябрьыште СССР Верховный Советын Президиумжын указше дене старший сержант Хаким Хасановлан Совет Ушем Герой лӱмым пуымо.
Авторын фотожо.