Марий Элым Вуйлатыше Ю.Зайцев СВО кайыме верлашке гуманитарный полышым колтымо дене кылдалтше совещанийым эртарен.
Регионым вуйлатыше военнослужащий-влаклан тыгай полышым погымо шотышто тыршыше-влакым тауштен да командир-влак дене кылым кучымыж, салтак-влаклан мо кӱлмӧ шотышто умылкалымыж нерген ойлен.
СВО зонышко адресный грузым писын намиен шуктыман. Марий Эл гыч грузым эреак колтен шогат. Тыште мер ушем, амалкалче, политический партийын еҥже да республикыштына илыше тӱрлӧ ийготан еҥ-влак кугун полшат.
Ик тыгай доброволецше – Кужэҥер районышто илыше Людмила Хлыстик. Тудын Сергей пелашыже – боевой действий-влакын участникше, «Боевое Братство» ветеран-влак организацийын Кужэҥер районысо председательже. А Людмила поро кумылым ончыктышо «Единство» фондым вуйлата, Белгород, Херсон областьлаш, ДНР-ыш да ЛНР-ыш гуманитарный полышым чумыра да колта. Сергей Хлыстик шкежак нине грузым наҥгая да салтак-влакын кидышкыштак кучыктен кода. Тылеч посна Хлыстикмыт военнослужащий-влакын ешыштлан, ДНР-ысе йочапӧрт ден госпиталь-влаклан, СВО-што боец-влакын кумылыштым нӧлташ полшышо поро кумылан концерт-влакым эртарыше-шамычлан полшат.
Гуманитарный полышым погымаште политический партийын еҥже-влакат чолган ушненыт. «Единый Россий» партийын регионысо пӧлкажым вуйлатыше 10-15 апрельыште СВО зоныш миен толмыж нерген отчётым ыштен.