Игече йӱкшемдыме дене регионыштына грипп шарлаш тӱҥалын кертеш. Чер деч аралалтме нерген Йошкар-Оласе 1-ше поликлиникын врач-эпидемиологшо Елена Владимировна Буянова каласкала:
Ик йӧн гына
Грипп дене черланаш огыл манын, мыланна ончылгоч ямдылалтман. Таче марте аралалташ полшышо ик эн куштылго йӧн – прививке. Тений ме молгунамсе семынак калыклан вакцинацийым эрташ темлена. Кызытсе лӱдыкшӧ ситуацийыште гриппшат озаланаш тӱҥалеш гын, пеш неле лиеш.
Кӧлан ок лий?
Ме чыланат обществын ик ужашыже улына, тӱшка верлаштат коштына, пашам ыштена. Сандене икте-весе дене кылна эреак уло. Тугеже прививкым кажне ыштышаш. Кӧн организмжылан прививкысе иктаж компонент келшен ок тол, нунылан тудым ышташ ок лий. Шукыж годым еҥ-влак тидын нерген шкешт палат.
Но шарныман: иктаж-могай вес прививкым ыштыме гын, тылзе эртышаш.
«Тазалыкем пеҥгыде»
Прививкым нигӧ виеш ыштыктен ок керт. Айдеме шке тазалыкшым чот сайлан шотла гын, иммунитетше виян улмым пала гын, вакциным шындыктыде кертеш. Но варажым прививкым шындыдымылан кӧра иктаж-могай нелылык лиеш гын, айдеме шкеак мутым кучаш тӱҥалеш.
Тореш улыт
Иммунопрофилактике нерген тӱрлӧ кӱлеш-оккӱлым ойлышо-влак эре лийыныт, улыт да лийыт. Но илыш ончыкта, тӱшка вакцинаций полшымо дене черым сеҥаш лиеш. Тыгай, мутлан, ырлыкан, дифтерий але столбняк годым лийын. Ты чер-влакым айдеме тукым прививке полшымо денак веле сеҥен кертын.