Тудым возаш тӱҥалме деч ончыч, мом шотыш налман…
Росмолодёжь молгунамсе семынак проект-влакым возымо конкурсын у тургымжым почмо нерген увертарен. 2023 ийыште ты конкурс кӱшеш тӱрлӧ направлений почеш грантым налаш йӧн уло. Тидлан могай теме почеш проектым возаш лиймым, кызытак шоныман, идейым кычалман. Икымше гана конкурсыш ушнаш шонышо-влак тыгайрак темлымашлан эҥертен кертыт:
– шке вийлан да моштымашлан ӱшаныман. Тудын деч посна кугу конкурслаш ушнаш нелырак.
– Улшо проблемым раш ончыктыман да тудым решатлаш тӱрлӧ йӧным темлыман. Тыгодым тидын дене могай иктешлымашке шуаш лиймым, ончыктыман.
– Командым чумырыман. Тидланже профессионал-влак дене пашам ыштыман. Нунын дене кеч-могай сомылымат виктараш, шонымашке шуаш куштылгырак.
– Сметым ямдылыман. Окса илышыште кугу верым налеш. Сандене проектлан мыняр шийвундым луктын пыштыман – чылажымат шотлыман. Тидланже регионыштыда тӱрлӧ сатулан да пашалан акым палыман.
– Проектым сайын тергыман. Тидланже тудын черновикшым «Молодёжь России» АИС сайтыште аралыман. Тыгак йолташ-влаклан ончыкташ уто огыл. Тыге йоҥылыш-влакым тӧрлаш, уто-ситыдымашым ешараш але кораҥдаш лиеш.
Икымше гана конкурсыш ушнаш шонышо ӱдыр-рвезе-влаклан грант шотышто документ-влакым сайын тергыман, тидлан методичкылан эҥертыман. Шукыж годым йоҥылыш-влак методичкым шотыш налдымылан вашлиялтыт. Сандене тӱткырак лийман!