11 июльышто Марий Элым Вуйлатыше Ю.Зайцев профессионал мастарлык шотышто Марий Эл Правительствын грантшым кучыктен. Тудым 43 сеҥышылан да 33 наставниклан пуымо.
«Профессионалы» толкыным идалык ончыч ыштыме. Ты чемпионатым кызыт тӱрыснек эртарен кертме. Участник-влак шке мастарлыкыштым тӱрлӧ отрасльыште ончыктеныт.
Ю.Зайцев студент ден юниор-влакым кӱкшӧ профессионализм дене ямдылымылан да полшымыштлан наставник-влаклан тауштен. Марий Эл Республикысе Правительствын икымше алмаштышыже М.Васютин ешарен: таҥасымаш-влакым эртарыме вер-влак современный оборудований дене веле огыл, тыгак эстетике могырым ойыртемалтыт. Тудын мутшо почеш, чемпионат-влакым эртарыме площадкылаште эн сай да йодмашлан шотлан толшо оборудований лийын, да тидыже мероприятийын кӱкшытшым ончыкта.
Вашешыже Йошкар-Оласе технологический колледжын студентше, «Внешнее пилотирование и эксплуатация беспилотных воздушных судов» номинаций дене чемпионатыште сеҥыше Даниил Назаров Правительствын полышыжлан тауштен, чемпионат профессионал шинчымашым ончыкташ веле огыл, путешествоватлаш да у еҥ-влак дене палымым ышташ йӧным пуа манын.
Чынжымак, тений 24 март гыч 19 апрель марте эртыше чемпионатыште 355 студент да 40 тунемше 54 компетенций дене мастарлыкым ончыктен. Пашаштым 408 эксперт аклен.
Кызыт чемпионатын 233 призёржо ден сеҥышыже-влак Марий Элысе 84 предприятий ден организацийыштыже стажировкым эртат.
Фото: Д.Речкин/ Марий Элым Вуйлатышын пресс-службыо.