Ончыч тиде Гомзеев почиҥга лийын. Тудлан XVII курымышто икымше руш поселенец-влак негызым пыштеныт. Лӱмжым Гомза лӱман пӧръеҥ дене кылдат.
Документлаште ял Гузнищево лӱм денат вашлиялтеш, а марий-влак тудым Йошкар-Ола шеҥгелне верланымыжлан Кутансола маныныт.
1917 ий революций деч вара 53 суртышто 367 еҥ илен. Тыште школ да кок коваште завод лийыныт, училищым почыныт. 1924 ийыште «1 Май» кооперативный артельым ыштыме, 1931 ийыште – колхозым. 1950-ше ийла тӱҥалтыште тудо Медведево ялсоветын «Новая жизнь» колхозышкыжо ушнен.
Кугу Отечественный сар годым ял шуко пӧръеҥым йомдарен, 45 еҥ сар гыч пӧртылын огыл.
Ялым 1963 ийыште Йошкар-Ола дене ушымо да Гомзово уремыш савырыме. Но тудо 1970-ше ийлаште гына чот чоҥалташ тӱҥалын. Кызыт ты ял олмышто Гомзово микрорайон верланен. Ял урем олмеш лопка Йошкар Армий урем шарлен каен, а воктенысе пасушто Подольский курсант-влак, Анциферов, Транспортный урем-шамыч шочыныт. Ялын кышаже Ладыгин ден Ползунов уремлаште палдырна.