МОСИ-ште «Герои-земляки» воин чап тоштерым почмо. Тыгай пӧлем «Росмолодёжь» молодёжьын пашаж шотышто федеральный агентствыжын грантше кӱшеш ышталтын.
Тоштерыш пурен шогалмеке да шола велыш ончалмеке, Совет Ушем Герой-влакын портретыштым ужына, а пурлаште – Россий Федерацийын вич геройжым. Кызыт тыште вич землякнан боевой корныж дене палдарыме, но материалым пойдараш да вашталташ шонат. Совет Ушем Герой Зинон Прохоров, Российын ХХ курымысо Геройжо-влак Валерий Иванов ден Марк Евтюхин, РФ-н Геройжо Дамир Шаймарданов да Патырлык орденын кавалерже Богдан Бульченко нерген стендым ямдылыме, нунын арверыштым вераҥдыме.
Ты суапле паша Прохоров уремыште верланыше тӧнежыште тунемше Зинон Прохоровым да моло геройжым палышаш шонымаш дене шукталташ тӱҥалын. Тудын ялыштыжак (Волжский район Олыкъял) шочын-кушшо кокымшо Герой, Чечня мландыште 19 ияш вуйым пыштыше Валерий Иванов, нергенат палдарыме. Тыгак Псковысо 6-шо ротын да землякна Марк Евтюхинын подвигыштым ушештарыме. Нуным шарныме лӱмеш рӱдолаштына пытартыш жапыште ятыр вер уло.
Теве Украиныште специальный военный операцийын участникше-шамыч салтак-влаклан колтымо сӱрет ден серыш-влакым пуэныт. Тыгак тоштерыште салтакын пуля дене рожаҥше плащ-палаткыже аралалтеш.
УМБАКЫЖЕ нине герой-влак нерген да нунын могай арверышт экспонатыш савырныме нерген — «Кугарня» газетыште пален налза.
