6 октябрьыште Москошто Гоголь бульварыште специальный военный операцийын участникше-влаклан пӧлеклалтше нылымше выставкым почмо.
Москошто
Ты церемонийыш Барнаул, Екатеринбург, Смоленск, Коми Республик да моло вер гычат Герой-влакын ешышт миеныт. А кундемна гыч ончерым почмаште РФ Президентын Марий Эл Республикысе постоянный представительже О.Ю.Бадма-Халгаева лийын.
Экспозиций Российын тӱрлӧ верыштыже шочын-кушшо да тӱрлӧ войскаште служитлыше 30 Геройын илышыж ден подвигше нерген каласкала.
Москошто ончерым Российысе военно-исторический обществе ямдылен. Тудын авторжо – научный пашаеҥ Виктория Петрикова.
Российын Геройжо ден Патырлык орденын кавалерже-влак ВДВ-н, морской пехотын, Военно-воздушный вийын, радиационный, химический да биологический аралалтмаш войска-влакын, мотострелковый часть ден спецподразделенийын салтакышт ден офицерышт, танкист, артиллерист да разведчик улыт. Посна стендым «Алёша» Т-80 танкын экипажшын подвигшылан пӧлеклыме – тудо Запорожье могырышто бронетехнике колонным пытарен.
Элнам аралыше-влак нерген увер ден фотом Герой-влакын родо-тукымышт деч налыныт. Тушто тунеммышт, спортышто сеҥымашышт, хоббишт да военный службышт нерген возымо. Нунын коклаште – Российын 14 Геройжо. Тиде Алексей Осокин, Денис Сорокин, Сергей Сухарев, Пётр Каштанов, Жумбай Раизов, Андрей Иванов, Олег Сорокин, Дмитрий Семёнов, Дамир Шаймарданов, Александр Бичаев, Василий Клещенко, Сергей Кузьминчук, Александр Жихарев да Денис Межуев.
Тиде экспозицийым октябрь мучаш марте ужаш лиеш. Варажым нине стендласе материал-влак дене палдараш тӱрлӧ регионыш колтат.
Землякна
Ик стендше мемнан землякна, Йошкар-Олаште шочын-кушшо салтак-танкист Дамир Шаймардановлан пӧлеклалтын.
Сарзыеҥ 2022 ий 30 апрельыште Славянск могырыш кайыме годым геройла колен. Долгенькое селам налме годым ротым вуйлатыше Шаймарданов танковый колонным вӱден да засадыш логалын.
Тиддеч ик-кок кече ончыч Дамир «Комсомольская правда» газетын военкоржо Александр Коцлан интервьюм пуэн, ты видеорепортажым телеканалла дене ончыктеныт. Тушто старший лейтенант пырля служитлыме йолташыж-влак дене пырля тушманын икмыняр танкшым пленыш налме нерген ойлен. Тул дене кредалаш огыл, а украин-шамычын танкыштым трофей семын поген налаш шонен пыштеныт. А ик трофейный танкшым Шаймарданов шкаланже налын да бортыштыжо «Z» манын возен шынден.