Суд пристав-влак федеральный службын Марий Эл Республикысе управленийжын Йошкар-Оласе судлаште порядкым эскерыме шотышто отделенийын пашаеҥже-влак судлаште иктаж туткар ынже лий манын, чот тыршат. Ты отделенийыште суд пристав элгӧргӧ службын младший сержантше Алексей Евгеньевич Кулалаев шуко жап ок ыште гынат, коллеге ден вуйлатыше-влакын пагалымашыштым сулен.
СИРИЙЫШТЕ
Пӧръеҥ – Сирийысе боевой действийын участникше. Кок командировко жапыште Алексей Евгеньевич элын чыла провинцийыштыже да кугу олалаште: Дамаск, Алеппо, Пальмира, Хомс, Дейр-эз-Зор – лийын шуктен. Идалык наре жапыште военнослужащийнавлак грузовой колонным ужатен коштыныт, вершӧрым патрулироватленыт, вуйлатыше-влаклан да аэродромлан лӱдыкшӧ ынже лий манын, пашам ыштеныт.
СВО-што
2022 ийыште А.Кулалаев специальный военный операцийыш каен. Шошым тушто боевой задачым шуктымыж годым механизироватлыме боевой колоннышт лӱйкалымашке логалын. Бронетранспортёрыш (лачак тушто боевой йолташыжевлак дене пырля А.Кулалаев лийын) тушманын колтымо ракетын снарядше логалын. Экипаж сусырген, пожар тӱҥалын, но кажне салтакын героизмжылан да ваш умылен пырля тыршымыштлан кӧра тушманым сеҥен кертыныт.
Алексей сусырген гынат, йолташыже-влаклан полшен. Тудо шке сусыржым шотыш налын огыл. БТРыш снаряд логалме годым Алексей Евгеньевич контузитлалтын да тудын пылышчораже кӱрлын улмаш. Жап эртымеке веле герой медик-влак деке каен, тудо Москосо ик госпитальыште эмлалтын. Тиддеч вара Суд пристав-влак федеральный службышко пашаш толын.
Боевой действийыште героизмым ончыктымылан салтак Суворовын медальже дене палемдалтын. Тудо тыгак Марий Эл Республикым Вуйлатышын «Участнику специальной военной операции на Украине» медальжым сулен.
СУДЫШТО, ПАРАДЫШТЕ
Алексей Кулалаев специальный подготовкышто сай лектышым ончыкта да шинчымашыжым пашаште кучылтеш. Тудо суд зданийлаште да суд заседанийлаште административный правонарушений-влакым ятыр гана чактарен, федеральный да исполнительный розыскышто улшо гражданвлакым кучен. Пӧръеҥ Кугу Отечественный сарыште сеҥымылан пӧлеклалтше пайрем парадыште Суд пристав-влак федеральный службын Марий Эл Республикысе управленийжын парад расчётыштыжо участвоватла.
Коллегыже-влак тыгай герой дене пашам ыштымышт дене кугешнат.
Суд пристав-влак федеральный службын Марий Эл Республикысе
управленийжын материалже почеш ямдылыме.