7 январьыште Советский посёлкысо 2-шо номеран школышто ондаксе тунемше С.Ржавиным шарныме лӱмеш волейбол дене турнир эртен. Сергей 2022 ий июльышто Украин мландыште СВО годым колен.
Тиде кечым арам огыл ойырен налыныт, 7 январьыште Сергейын шочмо кечыже лийын. Турнирым пӧръеҥын ондаксе класс вуйлатышыже ышташ кумылаҥын. Шийвундо дене тыгак пырля тунемшыже-влак да молат полшеныт.
Икымше вер дене «Советчане.ру» команде палемдалтын. Кокымшо верыш «Одноклассники.ру» лектын. Кумшо вер «Школьники 1».
Тыгай турнирым кажне ийын эртараш палемденыт.
Фотом Советский посёлкысо 2-шо номеран школын ВКонтакте тӱшкаж гыч налме.
