8 мартыште Совет Ушем Герой Алексей Громовын шочмо ялыштыже, Советский район Кукмарийыште, Герой лӱмеш ече дене таҥасымаш 44-ше гана эртаралтын.
Тений ечыгорныш Йошкар-Ола, Виче кундем да Марий Элын 14 районжо гыч 230 ечызе лектын! Нунын коклаште республикысе марий ӱдырамаш-влакын «Саскавий» мер ушемыштынат еҥже-влак лийыныт. Марий Элын сулло врачше Маргарита Тойшева ден Наталья Лебедева 2 меҥгыш куржыныт. Н.Лебедева шке ийготан-влак коклаште 1-ше верым налын.
Призёр-влакым ончычсо спорт министр В.Чумаков, СССР-ын ече дене спорт мастерже Л.Глушков да Советский районысо кучем вуйлатыше-влак саламленыт.
Анфиса Эманова.
Фото — «Саскавий» ушемын архивше гыч.