Кажне гаяк озаватын садыштыже але пакчаштыже георгин уло. Ятыр ӱдырамаш ты пеледышын кычалтылше огыл улмыжым палемда. Но тудо пеледмыж дене эшеат куандарыже манын, икмыняр каҥашым шотыш налман.
— Георгиным шындыме верысе мланым мульчироватлыман. Тыге кушкылым тӱрлӧ копшаҥге деч арален сеҥеда, мландымат уто гана пушкыдемдаш ок логал. Тыгак кукшо игече годым пеледыш вож ок кошко.
— Пеледышыш вӱдым арняште кок-кум гана шавыман. Шуко вӱдым оптыман огыл, вожшо шӱяш тӱҥалын кертеш.
— Шошо мучаште але кеҥеж тӱҥалтыште ӱяҥдыман. Тидлан суперфосфат, терыс, аммиачный селитре гыч ямдылыме ӱяҥдыш сай лиеш. Фосфор да калий гыч ямдылымым август тӱҥалтыште пуыман. Шошым азотан ӱяҥдышым шуко кучылтында гын, георгиныште лышташ шуко, пеледыш шагал шочеш.
— Пеледыш вурго чот кужу гын, иктаж-могай эҥертышым келыштарыман. Тале мардеж пеледыш вургым ынже тодыл манын, тудым эҥертыш деке пеҥгыдын кылдыман.
— Кошкышо пеледыш-шамычым вигак пӱчкедыман. Тыге вес пеледыш вуй-влак писынрак лектыт. Нуно вужга лийышт манын, ик вондышто кумыт деч шуко огыл лышташнерым кодыман.
— Пеледышым тӱрлӧ шукш-копшаҥге деч аралаш шовынвӱд полша. Тыгак тӱрлӧ химийым кучылташ лиеш. Шукыж годым георгин ош да сур шӱйшӧ (гниль) чер дене орлана. Тыгак бактериальный рак, лышташыште вӱргене тӱсан тамга-влак лекме черым палемдат. Садлан пеледышыште тыгайым шекланенда гын, тудым вигак кораҥдыман. Кушкылым жапыштыже эмлаш тӱҥалман.
— Икымше покшым деч вара георгиным урыман. Тыге пеледыш тендан чондам эше ятыр жап куандараш тӱналеш.